Pilipino Star Ngayon
October 14, 2025 | 12:00am
MANILA, Philippines — Magbabalik sa bansa sina Elite 16 champion English brothers Javier at Joaquin Bello para sumabak sa men’s division ng Beach Pro Tour Challenge sa Oktubre 15 hanggang 19 sa Nuvali Sands Court by the Ayala Land sa Santa Rosa, Laguna.
Hangad ng mag-utol na makabawi mula sa bronze medal finish sa BPT Challenge noong Disyembre matapos magkampeon sa BPT Elite 16 sa Rio de Janeiro, Brazil noong 2024.
Minalas ang Bello brothers kina German pair Paul Henning at Lui Wust, 0-2, sa semifinals ng nasabing torneo.
“The Bello brothers are coming,” ani Philippine National Volleyball Federation (PNVF) President Ramon “Tats” Suzara kahapon ilang araw bago ang main draw competition bukas. “Just like the rest of the participants, they are here to provide quality beach volleyball competitions.”
Ang Bello brothers ay No. 19 sa hanay ng 65 men’s participants mula sa 25 bansa sa torneong pinamamahalaan ng PNVF.
Ipaparada ng Pilipinas sina 2023 Southeast Asian Games bronze medalist Ran Abdilla at James Buytrago, ang dalawahan nina Ronniel Rosales at Rancel Varga at tambalan nina Edwin Tolentino at Larry John Francisco.
Idedepensa nina World No. 6 Jacob Holting Nilsson at Elmer Andersson ng Sweden ang kanilang korona.
“We would like to thank the Ayala and Nuvali for hosting another world class beach volleyball competition in their venue,” wika ni Suzara. “The level of the beach volleyball competition is just become more intense and higher than ever.”
Samantala, sasabak ang Team USA na wala sina Challenge champion Toni Rodriguez at Molly Shaw sa women’s category na binubuo ng 15 bansa na kinabibilangan ng 46 pares.
Dadalhin nina World No. 137 Sisi Rondina at Bernadeth Pons ang laban ng bansa bukod kina Jenny Gaviola at Alexa Polidario at Sunny Villapando at Dij Rodriguez at Kly Orillaneda at Gen Eslapor.