August 24, 2025 | 12:00am
FLASH Report: Inulan ng tawag si Dipuga at nagtatanong ng pagkakilanlan ni pretty policewoman. Siyempre ang sagot ko ay: Secret! May nagtatanong din kung sino ang manyakis na opisyal. Ganun pa rin ang sagot ko; Secret!
Subalit nung lumabas ang isyu ni pretty policewoman, tinawag ni police official ang kalbong si alyas Cris at nag-usap sila “behind closed door”. Magkasangga sila?
Hanggang sa ngayon, wala pang balita kung pinaimbestigahan ni NCRPO chief Maj. Gen. Anthony Aberin ang kahayukan ng police official. Teka nga pala, belated happy birthday kay General Aberin!
• • • • • •
Tinawag ni PRO9 Director Brig. Gen. Eleazar Matta na biggest drug haul ng command n’ya ang pagkakumpiska sa Zamboanga City ng 67 kilos ng shabu na nagkakahalagang P455 milyon nitong Agosto 19.
Nakorner si Mohammad Ikram Abdurajak, alyas Mohammad, sa halos tatlong kilometrong hot pursuit operations sa Zone 1, Bgy. Bungaio, Zamboanga City. Hindi naman nanlaban si Abdurajak mga kosa.
Ayon kay Matta, si Abdurajak, 46, ay isang newly-identified high value target na nag-o-operate sa PRO9 at kalapit na lugar. Sinabi ni Matta na si Abdurajak ay kasalukuyang ipinasailalim sa tactical interrogation upang matunton ang source niya ng shabu at kung kanino niya dinideliber ang kontrabando niya. Eh di wow! Anong sey n’yo mga kosa? Hehehe! Kailangan pa bang i-memorize ‘yan?
Sinabi ni Matta na si Abdurajak ay bukambibig ng mga pusher na nasakote ng mga tauhan niya. Kaya sa tulong ng lokal na asset, ikinasa ang buy-bust operation laban kay Abdurajak.
Kaya nakapuwesto na ang mga elemento ng RDEU9 ni Lt. Col. Gerald Gamboa, team leader Capt. Vincent Perez, na nasa supervision ni Col. Narciso Paragas, ADRDO ng PRO9; Zamboanga City PNP ni Maj. Simplicio Pasaol Jr., Phil. Navy, RMFB9, PDEG SOU9, PDEA ZCO at Lamitan police station ng BARMM para bumili ng P1 milyong halaga ng shabu kay Abdurajak.
Kaya lang, malakas ang pang-amoy ni Abdurajak at pinasibad kaagad ang puting HiLux niya (NHM 3421). Hindi naman nakalayo si Abdurajak at nasukol ng humahabol na tropa ng gobyerno. Kasama ni Abdurajak sa sasakyan ang kanyang asawa at anak. Ang sakit sa bangs nito.
Maliban sa sasakyan, narekober kay Abdurajak ang 67 kilos ng shabu na nagkakahalaga ng P455 milyon, at dalawang luggage bag. Swak sa banga si Abdurajak dahil ang mga arresting officers ay armado ng body worn cameras. Araguyyy!
Ang shabu ay dinala sa Regional Forensic Unit 9 for examination, samantalang si Abdurajak ay ipinasailalim sa drug test.
Iniutos din ni Matta ang pagsagawa ng backtracking operations para matunton ang source ng shabu ng suspect. Ang PRO9 mga kosa ay sakop ang Zamboanga Peninsula, Zamboanga Sibugay, Zamboanga del Norte, Zamboanga del Sur at Zamboanga City. Hehehe! Kanya-kanyang gimik lang ‘yan!
Ayon kay Matta sa history ng PRO9, ngayon lang nagkaroon ng ganitong kalaking drug haul kaya inabisuhan niya ang kanyang mga provincial at city directors na paigtingin ang kampanya laban sa droga. Sa drug syndicates sa PRO9, si Matta ay galing sa PDEG kaya alam niya ang pasikut-sikot ng laban kontra droga. Kayo rin?
Si Abdurajak ay kakasuhan sa Zamboanga City prosecutor’s office. Abangan!