September 8, 2025 | 12:00am
MANILA, Philippines — Mariing kinondena ng maimpluwensiyang Catholic Bishops’ Conference of the Philippines (CBCP) ang korapsiyon na may kinalaman sa flood control projects sa bansa at nanawagan na maibalik ang perang ninakaw mula sa mga mamamayan.
Sa isang pastoral letter, nanawagan din si CBCP president at Cardinal Pablo Virgilio David ng accountability sa private contractors at financiers, legislators, district engineers, government auditors, at political patrons, sa inilarawan niya bilang multi-layered na sistema ng graft sa bansa.
Kinuwestiyon din ni David ang kredibilidad ng Senado at Kongreso na nag-iimbestiga sa isyu dahil sa posibilidad na ilan sa kanila ay may kinalaman dito.
“Who inserted these projects into the national budget as pork, often at the expense of education, health, and social programs?,” aniya.
Binigyang-diin pa ni David na ang tunay na hustisya ay higit pa sa pagpaparusa sa nagsabwatan sa korapsiyon.
“It also calls for restitution: that stolen wealth be returned to the public coffers from which it was taken.”
“Many of those implicated will not be impoverished by such reparation, yet the nation remains poor if the funds are not restored,” anang arsobispo.
“Retribution in this sense is not personal vengeance but the rightful act of giving back what was stolen, so that the people may finally benefit from resources meant for their welfare.”
Kaugnay nito, hinikayat niya ang mga kabataan na gamitin ang kanilang platforms, partikular na ang digital space, upang ilantad ang kawalan ng hustisya, magbahagi ng facts at mag-demand ng reporma.
“Make corruption shameful again,” aniya pa.
Umapela pa siya sa mga lider ng pamahalaan, mga negosyo at simbahan na mamuhay ng disente at iwasan ang pagmamalabis.
“Let us rise above the floods of corruption together,” dagdag niya.