August 26, 2025 | 12:00am
PATULOY ang pagmamalabis ng China Communist Party (CCP). Inuutusan ang People’s Liberation Army-Navy at -Air Force na pasukin ang karagatan at airspace ng Japan, Taiwan, Vietnam, Malaysia, Indonesia, Brunei, at Pilipinas.
Kinukunsinti ang maritime militia na magnakaw ng isda sa exclusive economic zones ng iba’t ibang bansa sa Pacific Ocean, West Africa sa Atlantic Ocean, at East Africa sa Indian Ocean.
Pati Baltic at Arctic Seas ay pinapasok ng mga barkong Chinese, at nampapatid ng telecommunication cables at natural gas pipelines sa ilalim ng dagat. Sa madaling salita, nambabarumbado sa mundo.
Dahil diyan, pinag-aaralan ng iba’t ibang scholars ang kasaysayan ng China. Ang tanong ay dati na bang ganito ang China o ngayon lang sa ilalim ng CCP?
Pagtalo ng Japanese saQingsa Korea, 1895, Wikipedia
Ilan ito sa mga nauungkat na detalyes:
– Ang huling dynasty sa China ay ang Qing. Hindi ito Han Chinese. Lahing Manchu ito mula sa Manchuria. Namuno nu’ng 1644-1912.
–Sa ilalim ng Qing Dynasty inagaw ng China ang independyenteng kaharian ng Tibet sa kabundukan ng Himalayas. Inagaw din ang inner Mongolia mula sa Mongols, lahi ni Gengis Khan. Pati ang Xinjiang mula sa mga tribung Kazaks at Uyghurs na malapit sa Russia.
– Nu’ng manalo ang CCP sa civil war nu’ng 1949, pinasya nito na panatilihin ang mga lahing nilupig ng Manchus. Nilusob muli ng red army ang Tibet, inner Mongolia, at Xinjiang. Pati mga teritoryo ng Korea at Vietnam ay ginawa nitong mga probinsiya ng China.
– Tumalilis sa Taiwan ang natalong Kuomintang ni Chiang Kai-shek. Nagtatag ng government-in-exile sa independyenteng isla. Mula noon ay tinuring na ng CCP na sa kanila rin ang Taiwan at ngayon ay balak lupigin bilang Renegade province.
Mapagkamkam ang CCP. Hindi mapagkakatiwalaan.