SINABI ni President Ferdinand Marcos Jr. noong Miyerkules na kayang magtuluy-tuloy ang pagbebenta ng P20 per kilong bigas hanggang sa May 2028. “Watch me sustain it,” sabi ng Presidente. Ayon pa kay Marcos, natupad na niya ang pinangako noong panahon ng eleksiyon na makapagbenta ng P20 kada kilo ng bigas at naiintindihan daw niya ang sentimyento ng ilan na papogi lamang ang kanyang proyekto. Sabi ni Marcos, nalaman na nila ang paraan at magagawa ito hanggang 2028. Noon daw ay hindi nila maisagawa ang murang bigas dahil hindi pa kaya ng sistema.
Unang ginawa ang proyekto na pagbebenta ng P20 per kilong bigas noong Mayo 1 sa Cebu City. Prayoridad sa P20 per kilong bigas ang mga senior citizens, 4Ps beneficiaries, persons with disabilities at single parents.
Makalipas ang May 12 midterm elections, lumawak na ang mga lugar na nagbebenta ng P20 per kilong bigas. Lahat nang Kadiwa Centers sa Metro Manila ay inatasang magbenta. Nagbenta na rin sa Bulacan, Cavite, Laguna, Mindoro, at Rizal ng P20 per kilong bigas na mabibili sa Kadiwa Stores. Sumunod na linggo, nagbenta na rin ng P20 per kilong bigas sa maraming probinsiya sa Mindanao—Zamboanga del Norte, Basilan, Cotabato, Tawi-Tawi, Maguindanao del Sur, Maguindanao del Norte at Davao Oriental. Ayon sa Department of Agriculture, sa Setyembre, ibang lugar naman sa Mindanao ang mabibiyayaan ng murang bigas.
Tiniyak naman ni Agriculture Sec. Tiu Laurel na ang ibebentang bigas sa Kadiwa ay may quality. Minsan nang binatikos ni Vice President Sara Duterte na ang P20 pero kilo ng bigas ay ‘yung puwedeng kainin ng tao at hindi ‘yung pinakakain sa baboy. Sagot naman ng Palasyo, hindi dapat maging “anay” ang Vice President.
Isang dapat gawin ng pamahalaan para matiyak ang tuluy-tuloy na pagbebenta ng P20 per kilong bigas ay ang lubos na pagtulong sa mga magsasaka. Kung lubos na matutulungan ang mga magsasaka sa pamamagitan ng pagbibigay ng binhi, fertilizer, insecticide, sapat na patubig at iba pang tulong, tiyak na magkakaroon nang maraming ani. Sa lawak ng taniman ng palay, hindi na kailangang umangkat pa ng bigas ang Pilipinas.
Tutukan din ang mababang presyo ng palay na lagi na lamang problema ng mga magsasaka sa panahon ng anihan. Binabarat ang mga magsasaka ng mga ganid na palay traders. Ang benta nila ng palay ay P15 per kilo. Luging-lugi ang mga magsasaka.
Atasan ng Presidente ang National Food Authority (NFA) na bilhin ang palay ng mga magsasaka sa mataas na presyo para mawala na ang mga ganid na palay traders. Kung magagawa ng pamahalaang Marcos ang mga ito, maaring tuluy-tuloy ang P20 per kilong bigas.