September 23, 2025 | 12:00am
MANILA, Philippines — Bagama’t wala na sa kontensyon ang Alas Pilipinas ay patuloy pa rin sa panonood si head coach Angiolino Frigoni sa 2025 FIVB Volleyball Men’s World Championship sa Mall of Asia Arena sa Pasay City.
Ayon sa 71-anyos na Italian mentor, inoobserbahan at pinag-aaralan niya ang istilo ng mga koponang nakapasok sa Round of 16.
“I’m 71 years old but I also want to improve and want to see what they are doing in the other teams,” wika ni Frigoni. “If I can get something that I can use with my team, I will do it. Why not?.”
Iginiya ni Frigoni ang World No. 82 Alas Pilipinas sa makasaysayang unang panalo sa world championship matapos ang 29-27, 23-25, 25-21, 25-21 paggupo sa World No. 23 Egypt sa Pool A ng group stage.
Nadiskaril ang pagsampa ng mga Pinoy spikers sa Round of 16 ng 32-team tournament makaraang kumulapso sa World No. 16 Iran, 25-21, 21-25, 25-17, 23-25, 20-22.
“If you are able to learn from Angiolino, all the movements, I think that you can improve a lot,” ani Iranian coach Roberto Piazza.
Bago sumabak sa world meet ay nagkaroon ng training camp ang Alas Pilipinas sa Europe kung saan sila sumalang sa ilang tuneup games.
Nagkita naman sina Frigoni at middle blocker Alessandro Michieletto ng Italy matapos silang magsama sa Italian Under-21 team na nagkampeon sa FIVB Men’s U21 World Championship.
Si Italian coach Ferdinando de Giorgi ay naging player ni Frigoni sa Italian club Acqua Paradiso Gabeca Montichiari noong 1980s.
“Finally I saw Angiolino, the best coach in the Philippines,” sabi ni de Giorgi kay Frigono. “He coached the Philippines very, very well.”
Umakyat ang Pilipinas sa FIVB world rankings sa No. 77 mula sa pagiging No. 88 matapos ang panalo sa Egypt.