September 14, 2025 | 12:00am
FLASH Report: Gasgas na ang pangalan ni Pampanga PD Col. Eugene Marcelo sa illegal na negosyo tulad ng paihi, video karera, at perya dahil sa bagman n’yang si alyas Raniel.
Kaya kung walang accomplishments si Marcelo vs sugal lupa, alam mo na ang dahilan Gov. Lilia Pineda Mam! Ang mga pinoprotektahan ni Raniel ay ang paihi nina Pinggoy at Rudy sa Gutad, Floridablanca; alyas Fred sa San Simon at kay Eddie sa Lacpao, Lubao, ang hometown ni Gov. Pineda, at kung saan kasosyo dito si Raniel.
Ipinagmalaki rin ni Raniel na walang makagalaw sa video karera sa bayan ng Mabalacat dahil sagot n’ya ang huli kay Col. Marcelo. Abawww gid! May nakalatag ding peryahan si Raniel sa Bgy. San Nicolas, sa Ploridablanca.
-oooooo-
Walang humpay ang pagsisikap ng liderato ni PRO1 director Brig. Gen. Dindo Reyes na palayain ang Ilocos Region sa lahat ng klase ng banta sa seguridad. Kaya’t puspusan ang trabaho ng mga bataan ni Reyes para panatilihin ang kapayapaan at masigurong ligtas ang mamamayan, lalo na ang mga bumibisitang turista.
Open secret naman ‘yan mga kosa na itong Vigan ay dinarayo ng lokal at foreign tourist dahil sa mga Spanish houses, simbahan, at zoo ni ex-Gov Chavit Singson. Pinaalalahanan ni Reyes ang kapulisan sa kanyang sakop na magiging tapat sa kanilang sinumpaang tungkulin.
Nanawagan din siya sa publiko na ipagpatuloy ang suporta sa mga tagapagpatupad ng batas. “Ang mga miyembro ng PRO 1 ay dapat na manatiling tapat sa kanilang sinumpaang tungkulin na may integridad, propesyunalismo, at malasakit sa kapwa,” ani Reyes. Anong sey n’yo mga kosa? Hehehe! Kailangan pa bang i-memorize ‘yan?
Sinabi ni Reyes na pinaigting na ang anti-crime operations na isinagawa ng kanyang mga tauhan laban sa kriminalidad, illegal na droga, at mga loose firearms. Mula Agosto 26 hanggang Setyembre 6, 2025, nagsagawa ang PRO1 ng malawakang operasyon sa rehiyon ng Ilocos na nagbunga ng mga makabuluhang tagumpay sa pagpapatupad ng batas.
May kabuuang 56 anti-illegal drug operations ang ikinasa kung saan nasamsam ang 602.05 gramo ng shabu, 60.73 gramo ng marijuana, at nawasak ang 10,250 fully grown marijuana plants at 1,000 punla. Tinatayang aabot sa ?6.1 milyon ang kabuuang halaga ng mga nasabat na ilegal na droga, at 67 katao ang naaresto at kinasuhan.
Kung sabagay, itong droga ang kadalasang pinag-umpisahan o pasimuno ng mga krimen, di ba mga kosa? Hehehe! Ambot sa kanding nga may bangs!
Sa kampanya naman laban sa mga wanted persons, 82 na suspek ang naaresto, kabilang ang 9 na Most Wanted Persons. Ito ay bilang patunay sa matibay na paninindigan ng PRO1 na papanagutin ang mga nagtatagong kriminal.
Kasabay nito, nagsagawa rin ng 15 operasyon laban sa loose firearms na nagresulta sa pagkakaaresto ng 12 indibidwal, pagkakakumpiska ng 13 baril, at pagkakarekober ng 36 na unexploded ordnance.
‘Yan ang resulta ng isang linggong operation ng PRO1 ha mga kosa? Iniutos pa ni Reyes ang pinag-ibayong trabaho para itong mga kriminal at terorista ay mabulok sa kulungan.
“Ang mga tagumpay na ito ay bunga ng dedikasyon, disiplina, at pagkakaisa ng ating mga tauhan sa apat na lalawigan,” ani Reyes. Abangan!