CAPAS, Tarlac , Philippines — Itinakbo ni University of the Philippines standout Juliana Talaro ang gold medal sa women’s 10,000-meter walk sa ICTSI Philippine Athletics Championships kahapon dito sa New Clark City Athletic Stadium.
Nagtala si Talaro ng bilis na 55 minuto at 57.21 segundo para iwanan sina Azeneth Serat (56:51.95) ng UST at Sep Placido (57:59.90) ng University of the East.
Samantala, pinagharian ni Wenniel Simba ng Muntinlupa ang men’s Under-18 5,000-meter walk sa kanyang oras na 27.27.04 kasunod sina Rain Mabeling (27:29.95) at Jaycee Reyes (27:52.94) ng Biñan.
Ang event ay nagsisilbing qualifiers para sa bubuo ng national team na isasabak sa darating na Asian Youth Games sa Manama, Bahrain sa Oktubre at sa 33rd Thailand Southeast Asian Games sa Disyembre.
Samantala, pinamunuan nina Paris Olympian Lauren Hoffman at dating Asian champion Robyn Brown ang kanilang mga heats sa women’s 400-meter hurdles.
Nakatakda namang sumabak ngayong araw sina two-time men’s Southeast Asian Games shot put champion Willie Morrison at Fil-Am pole vaulter Elijah Cole.