February 28, 2025 | 12:00am
MANILA, Philippines — Luha, dugo at pawis ang naging puhunan ng mga Highrisers para makasampa sa best-of-three quarterfinals series ng 2024-25 Premier Volleyball League (PVL) All-Filipino Conference.
Tinalo ng No. 10 Galeries Tower ang No. 3 Cignal HD, 25-17, 25-22, 19-25, 25-19, sa knockout phase kahapon sa PhilSports Arena sa Pasig City.
“Worth it lahat ng luha, dugo at pawis. Kasi grabe iyong pinagdaanan namin before itong game na ito. Nag-start nu’ng January puro talo, talo, talo,” ani coach Lerma Giron. “We came into realization na hindi puwedeng ganito.”
Humataw si Ysa Jimenez ng 23 points mula sa 22 attacks at isang block para akayin ang Highrisers sa kauna-unahang quarterfinals stint sa ikaapat nilang kumperensya.
“Worth it lahat ng pagod. Sobrang dami naming pinagdaanan. Sabi nga nila everything happens for a reason,” ani Jimenez sa kanilang tropa na nagtala ng 1-10 record sa eliminations.
Nagdagdag si France Ronquillo ng 20 markers at may 11 points si Jewel Encarnacion.
May 26 excellent digs si libero Alyssa Eroa para sa kanilang depensa habang naglista si setter Fhen Emnas ng 14 excellent sets sa kanilang opensa.
Pinamunuan ni Vanie Gandler ang HD Spikers sa kanyang 17 points kasunod ang tig-13 markers nina Ishie Lalongisip at Jackie Acuña.
Bagama’t natalo ay may tsansa pa rin ang Cignal, naglista ng 8-3 marka sa eliminations, na makapasok sa quarterfinals sa kanilang pagsabak sa single round-robin play-in tournament.
Ang dalawang mananalong koponan sa play-in ang kukuha sa huling dalawang tiket sa quarterfinals.