September 12, 2025 | 12:00am
SA dami ng kuwentong “rent-tangay” na lumalabas ngayon, mukhang hindi lang ordinaryong carnapping ang problema kundi tila mismong mga bantay ng batas ang nadadamay. At dito pumasok si Senador Raffy Tulfo hindi na nagpaliguy-ligoy at tinira direkta ang kapulisan.
Sa privilege speech niya last Setyembre 10, todo banat si Tulfo sa PNP. Simple lang ang punto niya kung kayong mga pulis ang dapat nag-aalaga ng mga ninakaw na sasakyan, bakit parang sa inyo pa natatagpuan ang ilan?
Ang siste, may Ford Everest na nirentahan ng isang Tsino, hindi na ibinalik, at nang i-trace ng may-ari gamit ang GPS, aba, nasa loob pala ng Camp Crame. Hindi lang basta sa loob, kundi sa Married Officers’ Quarters pa ng mga opisyal.
Kung ikaw ang may-ari, anong mararamdaman mo? Matutuwa ka ba dahil safe at secured sa Crame ang oto mo, o matatakot dahil baka mismong bantay-salakay ang nag-alaga?
Dagdag pa ni Tulfo, iba-iba ang palusot ng mga opisyal. Sabi ng Anti-Kidnapping Group, ipinarada raw dahil walang space. Pero ayon naman sa Headquarters Support Service, “unauthorized” daw at iniimbestigahan pa. Kaya tanong ng senador: Ano ba talaga, PNP? Nagpapalusot o nagtatakipan lang?”
Ang masakit dito, malinaw ang red flag hindi na dapat pinagtatalunan kung may mali o wala. Kung mismong GPS ng biktima ang nagturo kung nasaan ang sasakyan at hindi galing sa PNP ang info, ewan na lang kung hindi pa halatang may sablay.
Buwelta ni Tulfo abuso ng kapangyarihan at kapal ng mukha ang amoy sa insidente. Kaya kahit todo-pansin ngayon ng gobyerno sa mga imprastraktura, dapat bantayan din ang bulok sa hanay ng kapulisan lalo na ang mga ninja cops na patuloy na nagpapasama sa pangalan ng PNP.
Sabi pa niya: “Huwag nang hintayin na masunog ang buong PNP bago kumilos.”
Sa madaling salita, hindi lang rent-tangay ang problema rito parang rent-a-trust issue na ang lumalabas. Kung mismong loob ng kampo ng mga opisyal may bahid ng iregularidad, sino pa kaya ang puwedeng pagkatiwalaan ng taumbayan?
Disklaymer: Ang artikulong ito ay opinyon at komentaryo batay sa mga pahayag ni Senador Raffy Tulfo at mga ulat na nailabas. Layunin nitong pukawin ang isipan ng publiko upang masusing busisiin ang mga isyung may kinalaman sa katiwalian. Ang sinumang tamaan ay malamang guilty sa sariling konsensiya.