February 25, 2025 | 12:00am
MANILA, Philippines — Dinomina ng Iloilo ang Criterium races sa Day One ng PhilCycling National Championships for Road na inihahandog ng MVP Sports Foundation at Standard Insurance kahapon sa Tagaytay City.
Nanguna si Allaeza Mae Gulmatico sa Women’s Youth 1 category matapos ungusan sina Joanna Mae Armendez at Jems Lucas sa five-day championships na inorganisa ng PhilCycling na pinamumunuan ni Philippine Olympic Committee president Abraham “Bambol” Tolentino.
Tinalo ni Maria Louisse Crisselle Alejado sina Maritanya Krogg at Yvaine Osias sa Women Youth 2 class event na nilahukan ng 700 cyclists na sasalang sa Criterium, Individual Time Trial at Road races sa Men at Women’s Youth, Junior, Under-23 at Elite categories.
Nagpedal ang mga siklistang may edad 16-anyos pababa sa 2.1-km circuit sa Tagaytay City Atrium na naging popular destination dahil sa Praying Hands monument.
Kumarera sila sa loob ng 20 minuto kung saan ang final two laps ang magdedetermina sa mga podium finishers.
Nanguna naman si Jazmine Kaye Vinoya ng Pangasinan sa Women’s Junior matapos sapawan sina Yvonne Alejado at Eloiza Pajarito.
Naghari si CJ Cabreros ng Narvacan sa men’s Youth 1 class at tumapos sina Raven Vidaz, Jerick Cabael at Silmar Khen Silao sa 1-2-3 sa Men Youth 1.
Nagawa rin ito nina Nheytan Pascua, Nathan Omana at Justine Yu sa Men Youth 2.
Papadyak ngayong umaga ang ITT races sa Tuy at Nasugbu sa Batangas. Bibitawan din ang ang Road events hanggang Biyernes sa 44-km circuit na ang start-finish area ay sa Barangay Putol sa Tuy at pepedal sa national highway sa Nasugbu, Balayan at Lian.
Pipiliin sa nasabing karera ang mga bubuo sa national road team ngayong taon.