August 30, 2025 | 12:00am
MANILA, Philippines — Idedepensa ni Melvin “El Gringo” Jerusalem ang kanyang suot na World Boxing Council (WBC) minimumweight crown laban kay South Africaan challenger Siyakholwa Kuse sa Oktubre 29 sa Smart Araneta Coliseum.
Ang boxing event ay paggunita sa 50th anniversary ng makasaysayang heavyweight clash nina boxing legends Muhammad Ali at Joe Frazier na idinaos sa Big Dome.
Tinalo ni Ali si Frazier.
Ito ang ikatlong pagkakataon na ipagtatanggol ni Jerusalem ang kanyang WBC title.
Inagaw ni Jerusalem ang WBC belt kay Japanese Yudai Shigeoka via split decision noong Marso 31, 2024.
Matagumpay niya itong naidepensa kay Mexican Luis Castillo noong Setyembre sa Manila at sa rematch nila ni Shigeoka noong Marso sa Japan.
Bitbit ng 31 anyos na si Jerusalem ang 24-3-0 win-loss-draw rting record kasama ang 12 knockouts, habang dala ng 22-anyos na si Kuse ang 9-2-1 (4 KOs) card.
Si dating International Boxing Federation (IBF) champion Daniel Valladares ang orihinal na lalabanan ni Jerusalem.
Ngunit nagkaroon ng problema ang Mexican sa kanyang visa issues kaya ang South African challenger ang napiling harapin ng Pinoy title-holder.
Nagmula si Kuse sa 10-round unanimous decision win kay Samuel Salva.