Pascual nagdomina sa Baguio Stage 8
BAGUIO CITY, Philippines — Sa kanyang pagpadyak sa eight-stage 2025 MPTC Tour of Luzon ay walang naging estratehiya si Dae Yeong Joo ng Gapyeong Cycling Team.
Sa kabila nito ay nakamit pa rin ng 29-anyos na South Koean ang korona ng Tour of Luzon sa isinumiteng 22 oras, 21 minuto at walong segundo sa pagtatapos ng 172.53-km Lingayen-Baguio City Stage 8 kahapon dito sa Camp John Hay.
“I have no game plan since Stage 1,” ani ng South Korean national champion na nanalo sa opening stage sa Paoay, Ilocos Norte at nabutasan ng hulihang gulong paakyat ng Baguio City. “I just push and push and no looking back.”
Sa pinakahuling stage na pinagwagian ni Joshua Pascual (04:16:14) ng Excellent Noodles Cycling Team ay nagtala si Joo ng 04:21:31.
Iuuwi ni Joo sa South Korea ang premyong P1 milyon.
“I just share this money to my teammates,” wika ni Joo na hindi hinubad ang suot na yellow jersey mula sa Stage 1 hanggang sa Stage 8.
Inungusan ni Joo ng anim na segundo si Jan Paul Morales ng Standard Insurance Philippines sa overall individual standings sa karerang inihandog ng DuckWorld PH at Cignal katuwang ang Pilipinas Live, Meralco, Maynilad, Metro Pacific Health, Megaworld, Landco, PLDT at Smart.
“Sabi ko kapag nag-champion ako, magre-retire na ako. Pero hindi pa ako nagcha-champion, so may isa pa ako,” wika ng 39-anyos na si Morales na sumemplang sa huling 400 metro ng Stage 1 sa Paoay na nagresulta sa panalo ni Joo.
Bigo rin si Mervin Corpuz ng MPT Drivehub na masilat si Joo.
“Siguro malas lang talaga dahil pinulikat pa ako,” wika ni Corpuz na sumegunda kay Joo sa Stage 7. “Bawi na lang ulit ako sa susunod na karera.”
Ang iba pang nasa Top 10 ay sina Jonel Carcueva (22:22:00) ng MPT Drivehub, Nichol Pareja (22:22:02) ng Victoria Sports, Jeremy Lizardo (22:23:40) ng Standard Insurance, Rench Michael Bondoc (22:24:15) ng 7-Eleven Roadbike, James Paul Escumbien (22:24:42) at Jerico Lucero (22:24:50) ng Go for Gold, Ronald Oranza (22:24:53) ng Standard Insurance at Rustom Lim (22:25:50) ng MPT Drivehub.
Samantala, nagtala ang MPT Drivehub ng 88:22:02 para pagharian ang team general classification at ibulsa ang P1 milyon.
Pumangalawa ang Standard Insurance na 11 segundo ang layo.