MANILA, Philippines — Lalabanan ng University of Perpetual Help System DALTA ang San Beda University sa Final Four ng NCAA Season 100 juniors basketball tournament sa FilOil EcoOil Centre sa San Juan City.
Magtutuos ang Junior Altas at Red Cubs ngayong alas-12 ng tanghali, habang sa alas-2:30 ng hapon ang duwelo ng nagdedepensang Letran Squires at College of St. Benilde-La Salle Greenhills Greenies.
Bitbit ng No. 1 Perpetual ang ‘twice-to-beat’ advantage sa pagsagupa sa No. 4 San Beda kagaya ng tangan ng No. 2 Letran kontra sa No. 3 CSB-LSGH.
Hangad ng Junior Altas na makabalik sa championship round matapos silang talunin ng Squires sa ‘winner-take-all’ Game Three sa NCAA Season 99 Finals.
Nagmula ang Perpetual sa 85-70 paggupo sa Letran sa pagtatapos ng elimination round.
“Let’s give it our best. We are halfway to our mission,” ani coach Jop Cleopas. “Stay focused.”
Isinara ng Junior Altas ang eliminations sa 8-1 record kasunod ang Squires, Greenies at Red Cubs na may magkakaparehong 6-3 kartada.
Nakamit ng Letran ang No. 2 spot dahil sa kanilang superior quotient sa CSB-LSGH at San Beda.
Muling aasahan ng Junior Altas sina Lebron Jhames Daep, Jan Roluna, Jericho Cristino, JD Pagulayan, Icee Callangan, Aries Borja at Kelsey Baldoria.
Sina MJ Vailoces, Francis Dollente, Laurence Batongbakal, Joaqui Wagan at Randaire Medroso ang isasagupa ng Red Cubs.