November 23, 2025 | 12:00am
MANILA, Philippines — Ikinukunsiderang leksyon ng World No. 63 Philippine national team ang 0-6 kabiguan sa No. 14 Poland sa Group A ng FIFA Futsal Women’s World Cup sa PhilSports Arena sa Pasig City noong Biyernes.
Kaya kumpiyansang makakabawi ang Filipina5 sa pagsagupa sa kapwa opening-night loser Morocco bukas.
“I know going into the next match, we’re going to take everything from this game, learn from it, but then put it behind us. That is not wearing us down for the next,” ani co-skipper Isabella Flanigan.
Sa harap ng halos 2,200 fans sa pamumuno nina Pasig City Mayor Vico Sotto, Philippine Sports Commission chairman Patrick Gregorio at Philippine Football Federation president John Gutierrez ay nakipagsabayan ang mga Pinay booters sa unang 20 minuto kung saan sila naiwanan ng mga Poles sa 2-0.
Ngunit kaagad umiskor si Julia Szostak sa pagbubukas ng second half na sinundan ng mga atake nina Julia Basta at Klaudia Dyminska para kumpletuhin ang dominasyon ng Poland.
“Alam ko hindi hindi po ito ‘yung resulta na gusto namin pero proud po ako sa ginawa ng team namin at lumaban po kami hanggang dulo,” wika ni co-skipper Inday Tolentin. “Ito ‘yung lesson namin kung paano kami mag-step up sa next game.”
Muntik maitala ni Tolentin ang 1-0 iskor kundi lamang tumama ang bolang sinipa niya sa poste.
“Siguro hindi pa po time na maka-score pero next game pag-iigihan ko pa,” dagdag nito.