MANILA, Philippines — Tatapusin ng San Miguel ang kanilang pagkauhaw sa korona at ang pangarap na Grand Slam ng karibal na TNT Tropang 5G sa Game Five ng Season 49 Philippine Cup Finals.
Hawak ang malaking 3-1 lead, pipilitin ng Beermen na dispatsahin ang Tropang 5G ngayong alas-7:30 ng gabi sa Smart Araneta Coliseum.
Huling nagkampeon ang SMC franchise noong 2024 Commissioner’s Cup tampok si import Bennie Boatwright laban kay Tyler Bey at sa Magnolia, 4-2.
Matapos itakas ng TNT ang kontrobersyal na 99-96 panalo sa Game One ay itinagay ng SMB ang Game Two, 98-92, Game Three, 108-88, at Game Four, 105-91, sa kanilang best-of-seven championship series.
“Alam naman natin kung gaano kagaling ang TNT, magba-bounce back ‘yun, try nila ipanalo ‘yung game. Pero kami, try namin i-close out,” ani eight-time PBA MVP at 12-time Best Player of the Conference winner June Mar Fajardo ng Beermen sa Tropang 5G.
Matapos ang 0-3 tournament start ay kumamada ang TNT ng isang six-game winning streak para makasampa sa playoffs at naharap sa isang twice-to-win disadvantage kontra sa Magnolia sa quarterfinals.
Tinalo nila ang Magnolia sa quarterfinals, 2-0, at ang Rain or Shine, 4-2, sa semifinals series para makatapat ang San Miguel sa PBA Finals.
Bukod sa puwersa ng 6-foot-10 na si Fajardo ay naging susi rin ng Beermen ang kanilang ginawang defensive adjustment matapos matakasan ng Tropang 5G sa Game One.
“If you notice, TNT is shooting a lot from the three-point area. Actually, in the first two games, more than 50 percent ang kanilang tira sa labas. So we have to extend our defense from the perimeter,” ani Austria.
“This is a championship game. Everybody has their own adjustment. I think our adjustment, nag-click sa amin,” dagdag ng 67-anyos na mentor na hangad ang kanyang ika-10 PBA title.
Inaasahang gagawin ng Tropang 5G ang lahat upang makapuwersa ng Game Six para sa asam na Grand Slam makaraang pagharian ang mga nakaraang PBA Governors’ Cup at Commissioner’s Cup kasama si import Rondae Hollis-Jefferson.