Krusyal na laro ng TNT at GSM

MANILA, Philippines — Ang paglapit sa tiket sa Top Four ang hangad ng TNT Tropang 5G at Barangay Ginebra sa krusyal na laro sa PBA Season 49 Philippine Cup.

Maghaharap ang Tro­pang 5G at Gin Kings nga­yong alas-7:30 ng gabi ma­tapos ang ‘no bearing’ game ng mga sibak nang Blackwater Bossing at Ter­ra­firma Dyip sa alas-5 ng ha­pon sa Ninoy Aquino Sta­dium sa Malate, Manila.

Solo ng NLEX ang lide­rato tangan ang 8-2 record kasunod ang San Miguel (6-2), Magnolia (7-3), TNT (6-3), Ginebra (6-3), Ran or Shine (6-3), Converge (6-4), nagdedepensang Me­ralco (6-5) at mga talsik nang Phoenix (3-7), NorthPort (1-8), Blackwater (1-8) at Terrafirma (1-9).

 Ang Top Four teams ma­tapos ang eliminations ang makakakuha ng ‘twice-to-beat’ incentive sa quarterfinals.

Nakuha na ang Road Warriors ng bonus.

“All we’re asking for is a chance and now we have a chance. But we all know how difficult that road is going to be. We’ll see what happens,” ani coach Chot Reyes sa Tropang 5G na nasa isang six-game winning streak matapos ang 0-3 panimula.

Huli nilang biniktima ang Dyip, 108-82.

Nagmula naman ang Gin Kings sa 85-81 panalo sa Hotshots sa kanilang ‘Manila Clasico’.