September 14, 2025 | 12:00am
ISANG 60-anyos na store owner sa Istanbul, Turkey, ang muntik nang maputulan ng kaliwang braso matapos itong maimpeksyon mula sa kagat ng magnanakaw.
Ang insidente ay naganap noong 2024 ngunit ngayong taon lamang iniulat ng Turkish media matapos mailathala sa isang scientific journal.
Noong unang bahagi ng 2024, tinangkang pagnakawan ng dalawang suspek ang tindahan ng hindi pinangalanang biktima. Sinubukan niyang lumaban, ngunit kinagat siya sa kamay ng isa sa mga suspek bago ito makatakas.
Dahil malalim ang kagat, nagtungo siya sa isang lokal na klinika at ginamot. Pinauwi rin siya matapos gamutin. Ngunit lumala ang kanyang kalagayan, nagsimula siyang lagnatin at manginig ang buong katawan.
Nang magpatingin siya sa Sultan Abdulhamid Han Training and Research Hospital, nalaman niyang may matinding impeksiyon siya mula sa kagat.
Sa loob ng dalawang linggo, kumalat ang impeksyon at umakyat sa kanyang braso, na namaga at nagbago ang kulay.
Nagpasya ang ospital na isailalim siya sa hyperbaric oxygen therapy, isang treatment na tumutulong sa mas mabilis na paggaling ng mga sugat, lalo na ang mga may impeksyon.
Naging matagumpay ang procedure, at sa loob lamang ng isang linggo ay malaki ang ibinuti ng sugat. Hindi na kinailangang putulin ang kanyang braso ayon sa mga doktor.
Pagkaraan ng tatlong buwan ng gamutan, gumaling na ang kinagat na braso.
“Ang bakterya mula sa bibig ng tao ay maaaring magdulot ng malubhang komplikasyon sa pamamagitan ng pagpasok sa subcutaneous tissue,” paliwanag ni Dr. Yavuz Aslan. Sabi pa ni Aslan, ang kasong ito ay nagbibigay-diin sa seryosong panganib ng impeksiyon mula sa kagat ng tao.