MANILA, Philippines — Dalawang pulis at isang tauhan ng Bureau of Corrections (BuCor) ang patay matapos sumiklab ang madugong shootout sa Brgy. Irawan, Puerto Princesa City, Palawan noong Biyernes Santo ng gabi.
Kinilala ang mga nasawi na sina Police Staff Sergeants Ryan Cris Cabaña at Jayson Fernandez; pawang kasapi ng Police Station 2 (PS2) ng Puerto Princesa City Police at ang personnel ng BuCor na si Jerson Ojario Talon.
Sa report ni Puerto Princesa City Police Office (PPCPO) Director P/Colonel Cristine Tabdi, nangyari ang insidente malapit sa isang bahay
na may naglalamay sa burol ng isang patay sa Zone 13 ng nasabing lugar bandang alas-9:40 ng gabi.
Isang concerned citizen ang nag-report sa himpilan ng pulisya hinggil sa nagaganap na barilan sa nasabing lugar sa pagitan ng tatlong biktima at ng mga armadong lalaki dakong alas-10:16 ng gabi.
Nagresponde naman ang mga awtoridad bandang alas-10:30 at dito’y inabutan na pawang nakabulagta na at wala nang buhay ang tatlong lalaki na kalaunan ay malaman na dalawang pulis at isang BuCor personnel.
Bineberipika ng mga imbestigador ang impormasyong ibinigay ng mga residente at opisyal ng barangay na nagkaroon umano ng hindi pagkakaunawaan sa pagitan ng dalawang pulis na sina Cabaña, kasamang si Fernandez, at si Talon, na humantong sa putukan na nagresulta sa kanilang agarang pagkamatay.
Kumalat din ang isa pang impormasyon sa komunidad na nag-uusap ang mga biktima malapit sa lamayan nang sumulpot ang hindi pa nakikilalang salarin at pinagbabaril sila bago tumakas.
Sinabi ni Brig. Sinabi ni Gen. Jovencio Badua Jr, Mimaropa regional director, isang Special Investigation Task Group na ang nilikha na siyang tututok sa malalimang imbestigasyon sa insidente.