MANILA, Philippines — Babanderahan ni reigning World Pool champion Carlo Biado ang kampanya ng Team Philippines sa 2025 Florida Open na magsisimula ngayong araw sa Caribe Royale Resort sa Orlando, Florida.
Makakasama ni Biado ang 13 pang Pinoy cue masters na magtatangkang masikwat ang korona.
Nakalaan ang kabuuang $200,000 premyo tampok ang $40,000 para sa magkakampeon.
Sisimulan ni Biado ang kampanya nito laban kay Sam Henderson ng Amerika sa first round.
Maliban kay Biado, aariba din sina Lee Van Corteza, Johann Chua, Roberto Gomez at Roland Garcia.
Sasagupain ni Corteza sa first round si Charles Seeger ng Amerika habang titipanin naman ni Chua si American Rick Miller sa hiwalay na laban.
Makakalaban naman ni Gomez si Ivica Putnik ng Croatia at haharapin ni Garcia si American Daniel Sanchez.
Sasabak din sa torneo sina Bernie Regalario, Mark Muir, Marvin Asis, Michael Baoanan, Miguel Salvilla, Harry Vergara, Patrick Gonzales, Jeffrey Roda at promising cue artist AJ Manas.
Makakalaban ni Regalario si Toh Lian Han ng Singapore, lalarga si Muir kontra kay Edward Koyongian ng Indonesia, at lalarga si Asis laban kay American Landon Hollingsworth.
Sariwa pa si Biado sa matamis na pagkopo ng kanyang ikalawang World Pool 9-Ball Championship crown kamakailan sa Jeddah, Saudi Arabia.