MANILA, Philippines — Winalis ng No. 2 Petro Gazz ang No. 11 Capital1 Solar Energy, 25-19, 25-23, 25-20, papasok sa quarterfinals ng 2024-25 Premier Volleyball League (PVL) All-Filipino Conference kahapon sa PhilSports Arena sa Pasig City.
Hinataw ng Gazz Angels ang kanilang ika-10 sunod na panalo patungo sa best-of-three quarterfinal series.
Nagkadena si Fil-Am Brooke Van Sickle ng 19 points mula sa 15 attacks, dalawang service aces at dalawang blocks.
Umiskor si Myla Pablo ng 17 markers, habang may 12 points si Fil-Am MJ Phillips sa paghuhulog sa Solar Spikers sa play-in tournament kung saan pag-aagawan ang huling dalawang quarterfinal berths.
“Ginampanan ko lang din ‘yung trabaho ko this conference na alam ko kailangan ako ni coach (Koji Tsuzurabara). As a player, ‘yung confidence ko talaga is bumabalik kasi may goal din kami,” ani Pablo.
“You want to win, but the opponent also wants to win. Everyone did their best,” dagdag ni Tsuzurabara sa Petro Gazz na makakasama sa quarterfinals ang No. 1 Creamline at No. 10 Galeries Tower.
Nagposte si No. 3 overall pick Leila Cruz ng team-high 16 points para sa Capital1, habang nagdagdag si Jorelle Singh ng 10 points, limang excellent digs at pitong excellent receptions.
Lalabanan ng Gazz Angels sa quarterfinals ang mananalo sa Cignal HD Spikers at Solar Spikers sa Pool A ng play-in tourney.
Sasalang sa Martes ang Akari at Farm Fresh at ang PLDT at ZUS Coffee.