September 5, 2025 | 12:00am
MANILA, Philippines — Sumalang agad sa ensayo ang Swim League Philippines-Behrouz Elite Swimming Team (SLP-BEST) tankers para matiyak na handa ang mga ito bago sumabak sa sa 2025 Asian Open School Invitational (AOSI) Short Course Age Group Swimming Championship na magsisimula bukas sa Bangkok, Thailand.
Naramdaman agad ng mga Pinoy bets ang swimming pool sa Assumption University Aquatic Center na siyang gagamiting venue ng two-day meet.
Nanguna sa ensayo sina SLP-BEST Patriots Madi Mojdeh ng La Salle-Greenhills at Mikee Mojdeh ng Immaculate Heart of Mary College-Parañaque kasama sina Kaidiyn Brie Waskiewicz, Tanjie Elleise Waskiewicz at Aliyya Faine Mojdeh.
“We had a quick training at the venue para ma-feel na nila ‘yung pool and makapag-adjust na agad. After that, rest na muna para fresh ulit before the competition on Saturday,” ani SLP-BEST team manager Joan Mojdeh.
Unang hahataw sa opening day si Madi na masisilayan sa boys’ 14-year division 200m Individual Medley (IM), habang aariba naman si Mikee sa boys’ 10-year class 200m IM.
Susubukan ni Kaidiyn Brie na humirit ng medalya sa girls’12-year 200m IM at 50m freestyle gayundin si Tanjie Elleise sa girls’ 16-year 50m free at 100m free.
Lalarga naman si Aliyya Faine sa girls’ 8-year 50m free at 100m free.
Masisilayan din sa opening day sina Drei Mabilin (boys’ 10-year), Chelsea Faith Sy Bang (girls’ 9-year), Chloe Skye Sy Bang (girls’ 7-year), Leane Jewel Arellano (girls’ 9-year) at Marien Jade Arellano (girls’ 9-year).
Mapapalaban ang mga Pinoy tankers sa Asian meet dahil lalahukan ito ng mga mahuhusay na tankers mula sa iba’t ibang panig ng rehiyon kabilang na ang Singapore, Mongolia, Malaysia at host Thailand.