September 9, 2025 | 12:00am
MAY plano kaya si ex-PNP chief Gen. Nicolas Torre III na tumakbo sa 2028 elections?
Kung meron, maaring isa ito sa dahilan kung bakit sinibak siya sa puwesto. At ang may kasalanan nitong lahat ay sina ex-Sen. Antonio Trillanes IV at political analyst Richard Heydarian.
Matatandaan na pinangarap ni Trillanes ang tandem na Risa Hontiveros-Torre sa darating na 2028 presidential elections. Si Heydarian naman ay walang kiyemeng isinusulong si Torre for president. Araguyyy!
Alam naman natin na masyadong popular si Torre, lalo na sa hanay ng anti-DDS. At kung tuluy-tuloy ang kasikatan niya hanggang magretiro siya sa Marso 11, 2027, abayyy lalaki ang tsansa n’yang manalo sa napipintong halalan kahit senador pa ang tatakbuhin niya. Gets n’yo mga kosa?
Ang kasalanan lang ni Torre, mukhang na-enjoy niya ang posibilidad na sasabak siya sa pulitika at hindi niya tinuldukan ang mga planong political nina Trillanes at Heydarian. Hehehe! Ambot sa kanding nga may bangs!
Si Torre ay nasibak na sa puwesto nang sabihin n’yang wala s’yang balak pumasok sa pulitika sa pagdalaw niya kay party-list Rep. Leila de Lima. Ang tanong sa Camp Crame, “Bakit dinalaw niya si Leila?” May unholy alliance ba?
Dahil sa katahimikan niya sa pag-link sa kanya sa pulitika, pinukaw ni Torre ang mga isipan ng mga may ambition na tumakbo sa pagka-presidente sa 2028. Isa na riyan si Speaker Martin Romualdez, subalit mukhang wala siyang partisipasyon sa biglaang pagsibak kay Torre.
Ang itinuturo ng mga kosa ko na culprit ay si DILG Sec. Jonvic Remulla na “stellar” ang relasyon kay Torre. Sina Romualdez at Boss Jonvic ang ginu-groom ng Palasyo na tatakbo bilang kapalit ni President Bongbong Marcos.
Ang pangamba ng mga kalaban ni Torre, kapag tumagal pa siya sa trono ng PNP, lalong sisikat pa ito, dahil sa 5-minute response program niya. At hindi in si Torre sa Palasyo. Kaya maaga pa lang, kailangan nang tagpasin ang pakpak niya. Mismooo!
Hindi lang ‘yan, ang problema pa ni Torre ay dire-diretso lang ang liderato niya. Hindi niya pinag-aralan ang relasyon ng mga miyembro ng Gabinete kay BBM. Buong akala kasi niya, suwabe ang dating n’ya kay BBM, kaya’t kahit may demolition job pa sa kanya hindi niya pinapansin.
Ang hindi alam ni Torre may graduate ng PMA at exclusive schools tulad ng UP sa Gabinete ni BBM na may kanya-kanyang manok sa 2028. Kaya sa dahan-dahang pagngatngat sa kanya, 85 days lang siya sa puwesto. Araguyyy! Ano ba ‘yan?
Kung sabagay, hindi pa nagsasalita si Torre ng tunay na dahilan kung bakit nasibak siya. Ini-enjoy pa niya ang bakasyon at ang 4-star general niya. Sanamagan! Hehehe! Kanya-kanyang gimik lang ‘yan!
Habang nasa bakasyon siya, may lumutang naman sa social media na mga hakbangin na ibalik si Torre sa trono ng PNP. Tsk tsk tsk!
Para kay Dipuga, next to impossible na ‘yan. Tapos na ang laban. Kaya mag-target shooting at maglaro muna ng piano si Torre dahil matagal pa ang 2028. Anong sey n’yo mga kosa?
Kung sabagay, nakalulungkot din itong sinapit ni Torre dahil pinaakyat lang siya sa puno ng saging at tinagpas.
Bakit hanggang sa ngayon, tahimik pa si BBM kung bakit sinibak niya si Torre? Malalim kaya ang dahilan? Abangan!