Pilipino Star Ngayon
October 11, 2025 | 12:00am
MANILA, Philippines — Pamumunuan nina gymnast Karl Eldrew Yulo at jiujitsu prodigy Aielle Aguilar ang mga batang atletang pararangalan sa 5th Nickel Asia Corporation (NAC) Siklab Youth Sports Awards ngayon sa Grand Ballroom ng Diamond Hotel Manila.
Nakatakda ang event sa ganap na alas-4 ng hapon.
Ito ang pang-limang sunod na pagkakataon na bibigyan ng tropeo si Yulo, ang nakababatang kapatid ni 2024 Paris Olympics double gold medalist Carlos Yulo, sa event na suportado ng Philippine Sports Commission, Philippine Olympic Committee, CEL Logistics, MVPSF, Smart/PLDT at Go For Gold.
Gagawaran din ng pagkilala sina elite junior athletes Rianne Malixi (golf), Pi Durden Wangkay (athletics), Dean Darnet Venerable (taekwondo), Tenny Madis (tennis), Kira Ellis (triathlon) at Sam Cantada (volleyball).
Makakasama rin sa eksena ang mga Youth Heroes Awardees na sina weightlifters Jay-R Colonia, Alexandra Ann Diaz, Althea Bacaro, Jhodie Peralta at Albert Ian Delos Santos na kumolekta ng kabuuang 10 gold, 3 silver at 3 bronze medals sa nakaraang 2025 World Youth and Junior Weightlifting Championships sa Lima, Peru.
Ito naman ang ikatlong sunod na Siklab honor ng 7-anyos na si Aguilar makaraang dominahin ang kanyang dibisyon sa Pan Kids IBJJF Tournament.