October 10, 2025 | 12:00am
MANILA, Philippines — Pinalakas na puwersa ng TNT Tropang 5G ang magmamartsa sa duwelo kontra sa bagong-bihis na Phoenix para sa tangkang mainit na arangkada ng kanilang paghihiganti sa PBA Season 50 Philippine Cup sa Ynares Center sa Montalban, Rizal.
Susubukan ng Tropang 5G ang kalibre ng Fuel Masters sa mando ng bagong head coach na sa Willy Wilson ngayong alas-7:30 ng gabi pagkatapos ng pasikalaban sa pagitan ng Terrafirma at Blackwater sa alas-5:15 ng hapon.
Walang nakuhang mataas na rookie pick si coach Chot Reyes subalit nakasikwat ng tatlong pambatong manlalaro mula sa free agency upang patibayin ang koponan sa gitna ng mga injuries nito.
Nakuha ng TNT ang serbisyo nina Jio Jalalon mula sa NorthPort (Titan Ultra ngayon), Tyrus Hill ng Blackwater at Kevin Ferrer ng Terrafirma.
Umaasa si Reyes na sapat na ito upang mapunan ang injuries nina Jayson Castro at Poy Erram at ang pagreretiro ni Ryan Reyes bagama’t mabuting balita ang pagbabalik nina Calvin Oftana, Roger Pogoy at Rey Nambatac mula sa sarili nilang injuries sa nagdaang Season 49.
Subalit higit doon ay misyon ng Tropang 5G ang matamis na bawi matapos madiskarila ang asam na Grand Slam sa Season 49.
Naghari ang TNT sa Governors’ Cup at Commissioner’s Cup kontra sa Barangay Ginebra subalit yumukod sa San Miguel sa Philippine Cup.
Haharang sa daan ng Tropang 5G ang Fuel Masters na gagabayan ni Wilson kapalit ni dating coach Jamike Jarin na team consultant ngayon.
Nakuha ng Phoenix sa draft si No. 8 pick at dating NCAA MVP Will Gozum subalit hindi muna makakasama dahil sa kailangan pang tapusing ang kontrata sa Quezon Huskers sa MPBL.
Gayundin ang No. 1 pick na si Geo Chiu ng Terrafirma dahil sa kampanya ng Abra Weavers.
Mamando sa Dyip ang bagong coach na si Ronald Tubid.
Susukat kay Tubid ang batikang tactician din na si Jeff Cariaso na ibabandera naman ang No. 3 pick na si Dalph Panopio.