September 9, 2025 | 12:00am
MANILA, Philippines — Magarbong tinapos ng Swim League Philippines-Behrouz Elite Swim Team (SLP-BEST) Patriots ang kampanya nito makaraang bumanat ng anim na ginto sa huling araw ng kumpetisyon tampok ang dalawa pang bagong rekord sa 2025 Asian Open School Invitational (AOSI) Short Course Age Group Swimming Championship na ginanap sa Assumption University Aquatic Center sa Bangkok, Thailand.
Siniguro ni Behrouz Mohammad Madi Mojdeh ng La Salle-Greenhills na matikas ang pagsasara nito sa torneo matapos sumisid ng tatlong ginto kabilang ang dalawang record-breaking performances sa boys’ 14-year.
Unang bumanat si Mojdeh sa 200m freestyle kung saan nagtala ito ng dalawang minuto at 3.42 segundo para wasakin ang dating marka na 2:03.65 ni Woraphakphong Rachatatevin ng Thailand noong 2024.
Muling umariba si Mojdeh sa 100m butterfly bitbit ang 59.85 segundo para tabunan ang 1:03.06 ni Rachatatevin.
Tinapos ni Mojdeh ang kampanya nito sa isa pang gold-medal showing sa 100m Individual Medley sa oras na 1:03.40.
Sa kabuuan ay may pitong ginto at isang pilak si Mojdeh kasama ang limang bagong rekord.
Wala ring nakapigil sa nakapababata nitong kapatid na si Mikhael Jasper Mikee Mojdeh na humataw ng dalawang ginto, dalawang pilak at isang tanso sa boys’ 10-year.
Naghari si Mikee sa 100m backstroke sa kanyang 1:22.14, habang namayagpag din ito sa 100m butterfly bitbit ang 1:22.85.
Nakasiguro pa ang Immaculate Heart of Mary College-Paranaque tanker ng pilak sa 200m freestyle (2:37.66) at 50m butterfly (37.15) at tanso sa 100m IM (1:24.37).
Sa kabilang banda, nakahirit ng ginto si Lucena City pride Elisa De Kam sa girls’ 14-year 200m freestyle (2:28.17).
Nagdagdag si Kaidyn Brie Waskiewicz ng pilak sa girls’ 12-year 100m backstroke (1:15.43) at tanso si Tanjie Waskiewicz sa girls’ 16-year 100m IM (1:18.63).
“We’re so proud of these young swimmers. Hindi sila nagpatalo sa mga Asian counterparts nila,” ani SLP-BEST team manager Joan Mojdeh.