September 29, 2025 | 12:00am
MANILA, Philippines — Magbabalik si Montenegrin import Jelena Cvijovic hindi para sa Chery Tiggo kundi para sa Galeries Tower.
Sasandigan ng Highrisers ang 6-foot-1 outside hitter sa kanilang kampanya sa darating na 2025 Premier Volleyball League (PVL) Reinforced Conference.
Huling naglaro si Cvijovic sa PVL noong 2022 Reinforced Conference bilang reinforcement ng Crossovers.
“Big move. Big heart. Please welcome Jelena Cvijovic to the Highriser family! A new chapter begins with the #HighriseHustle,” wika ng koponan sa kanilang Facebook post.
Makakatuwang ni Cvijovic sa Galeries Tower, gigiyahan ni coach Godfrey Okumu kapalit ni Lerma Giron, sina Julia Coronel, Jean Asis, Jewel Encarnacion, Ysa Jimenez atFrance Ronquillo.
Bigo ang Highrisers na makapasok sa playoffs ng mga nakaraang 2025 PVL on Tour at Invitational Conference na parehong pinagreynahan ng PLDT High Speed Hitters.
Isasalang ng PLDT si Russian Anastasiia Bavyki para sa hangad na ‘three-peat’.
Paparada rin sina imports American Courtney Schwan (Creamline), Greek Eva Chantava (Cignal HD), Cuban Yunieska Batista (Chery Tiggo), Belgian Helene Rousseaux (Farm Fresh), American Anna DeBeer (ZUS Coffee) at Spain national team standout Paola Martinez Vela (Nxled).