October 6, 2025 | 12:00am
MANILA, Philippines — Matapos mabigong makapasok sa main draw ng Wuhan Open sa China, sesentro na ang atensiyon ni Alex Eala sa Japan Open na papalo sa Oktubre 13 hanggang 19 sa Osaka, Japan.
Maagang nasibak si Eala sa qualifying round ng Wuhan Open kung saan lumasap ito ng 4-6, 6-3, 2-6 kabiguan sa kamay ni Moyuka Uchijima ng Japan sa first round.
Bago ang laro nito sa Wuhan Open, lumasap muna ng 6-2, 2-6, 6-7 (0) desisyon si Eala kay Viktoria Golubic ng Switzerland sa quarterfinals ng Suzhou Open sa China.
Kaya naman tututok na si Eala sa Japan Open na isang 250-level WTA tournament.
May isang linggo si Eala para makapagpahinga bago muling sumabak sa aksyon sa Japan Open na lalahukan ni defending champion Suzan Lamens ng Netherlands.
Aarangkada rin sa naturang torneo si four-time Grand Slam champion Naomi Osaka ng host Japan.
Maliban kina Osaka at Lamens, hahataw din sa torneo si Filipino-Canadian Leylah Fernandez gayundin si world No. 9 Elise Mertens ng Belgium.
Ilang pamilyar na mukha rin ang nagkumpirma ng partisipasyon gaya nina world No. 28 Cristina Bucsa ng Spain na siyang tumalo kay Eala sa second round ng US Open, Emiliana Arango ng Colombia na tumalo sa Pinay netter sa first round ng French Open.