October 9, 2025 | 12:00am
MANILA, Philippines — Inilista ng Titan Ultra ang unang panalo sa PBA Season 50 Philippine Cup matapos patumbahin ang Meralco, 100-96, kahapon sa Ynares Center sa Antipolo City.
Nagpasabog si Calvin Abueva ng career-high 41 points kasama ang 9-of-10 shooting sa free throw line para sa 1-0 baraha ng Giant Risers.
Mula sa pagkakatabla sa halftime, 45-45, ay kumawala ang Titan Ultra sa third period sa pangunguna ni Abueva para ilista ang 72-60 sa huling 2:52 minuto.
Bumangon ang Meralco buhat sa 80-92 pagkakabaon para makalapit sa 87-92 sa 2:41 minuto ng fourth quarter sa likod nina CJ Cansino, Chris Banchero at Brandon Bates.
Kumonekta ng three-point shot si Munzon para sa Giant Risers na sinagot ni Chris Newsome ng 4-point shot para sa 91-94 pagdikit ng Bolts sa huling 1:43 minuto.
Matapos ang basket ni center Jeo Ambohot ay nagsalpak si Jerrick Balanza ng dalawang free throws para ilayo ang Titan Ultra sa 98-91 sa nalalabing 29.7 segundo.
Huling dumikit ang Meralco sa 95-98 galing sa 4-pointer ni Cansino sa natitirang 17.5 segundo.
Mintis ang dalawang free thows ni Giant Risers rookie Chris Koon, ngunit muli nilang napasakamay ang posesyon na nagresulta sa dalawang charirties ni Munzon para sa 100-95 bentahe.