October 11, 2025 | 12:00am
MANILA, Philippines — Sisimulan ni American import Anna DeBeer ang kampanya para sa ZUS Coffee sa pagsagupa sa Chery Tiggo sa 2025 Premier Volleyball League (PVL) Reinforced Conference.
Magtutuos ang Thunderbelles at Crossovers ngayong alas-4 ng hapon kasunod ang salpukan ng nagdedepensang Creamline Cool Smashers at Akari Chargers sa alas-6:30 ng gabi sa Dasmariñas Arena sa Cavite.
Hindi nakalaro sina DeBeer at Annie Mitchem sa 24-26, 25-23, 17-25, 25-24, 15-7 pagtakas ng ZUS Coffee sa Akari sa pagbubukas ng torneo noong Martes.
Ito ay dahil hindi napirmahan ng Philippine National Volleyball Federation (PNVF) ang International Transfer Certificates (ITCs) ng mga imports para makalaro sa PVL.
Ngunit kinabukasan ay nilagdaan na ito ng PNVF at nagdesisyon ang PVL na i-replay ang nasabing laro.
Makakatuwang ni DeBeer sa Thunderbelles sina Riza Nogales, Chinnie Arroyo, Fiola Ceballos, Jovelyn Gonzaga, rookie AC Miner, Kate Santiago at Alas Pilipinas member Thea Gagate.
Ihaharap ng Crossovers si Cuban ace Yunieska Batista kasama sina Ara Galang, Cess Robles, Renee Peñafiel, Shaya Adorador, Imee Hernandez, Seth Rodriguez at ang nagbabalik na si Mylene Paat.
Sa ikalawang laro, ipaparada ng Cool Smashers si American import Courtney Schwan laban kay Mitchem ng Chargers.
Susuporta kay Schwan sa Creamline sina Michele Gumabao, Alyssa Valdez, Jema Galanza at ang nagbabalik na si Tots Carlos.
Itatapat ng Chery Tiggo sina Mitchem, Ivy Lacsina, Grethcel Soltones, Eli Soyud, Chenie Tagaod, Camille Victoria, Ced Domingo at Fifi Sharma.