Pilipino Star Ngayon
October 20, 2025 | 12:00am
MANILA, Philippines — Inangkin nina Alejandro Huerta at Adrian Gavira ng Spain at Anniina Parkkinen at Valma Prihti ng Finland ang gold medal ng Volleyball World Beach Volley Pro Tour Challenge kahapon sa Nuvali Sands Court by Ayala Land sa Santa Rosa, Laguna.
Hinataw nina Huerta at Gavira ang 21-17, 19-21, 17-15 panalo laban kina crowd-favorite twins Joaquin at Javier Bello ng England sa men’s division.
Dinispatsa naman nina Parkkinen at Prihti sina Lithuanian duo Leva Dumbauskaite at Gerda Grudzinskaite, 17-21, 21-14, 15-11, sa women’s class
“Adrian made an outstanding defense particularly in the deciding set and we kept everything close,” sabi ni Huerta. “We didn’t give up before opportunity strikes.”
Samantala, sinikwat nina Manuel Alfieri at Alex Ranghieri ng Italy at nina Stefanie Fejes at Jasmine Fleming ng Australia ang bronze sa kanilang mga dibisyon.
Binalikan ng World No. 48 pair nina Alfieri at Ranghieri sina World No. 28 Christoph Dressler at Philip Waller ng Austria, 17-21, 21-18, 15-12, para sa podium finish sa men’s category.
Pumalo ang Italian tandem ng pinagsamang 41 points—tampok dito ang 19 kills ni Alfieri—kumpara sa 37 markers ng Austrian duo.
Nauna nang umabante sina Joaquin at Javier Bello sa men’s finals matapos ang 11-21, 21-19, 15-11 semifinal win kina Alfieri at Ranghieri.
Bumangon din ang No. 58 pair nina Fejes at Fleming mula sa opening loss para talunin sina No. 45 Kylie Neuschaeferova at Martina Maixnerova ng Czechia, 13-21, 21-15, 15-13, sa women’s division.
Humataw si Fejes ng 19 kills sa 40 points ng Australia sa pagresbak sa Czechia.