MANILA, Philippines — Mangangailangan ulit ang Adamson University ng nagliliyab na laro ni super rookie Shaina Marie Nitura para madagit ang Far Eastern University sa second round ng UAAP Season 87 women’s volleyball tournament sa Smart Araneta Coliseum.
Magpapaluan ang Lady Falcons at Lady Tamaraws ngayong alas-3 ng hapon matapos ng bakbakan ng University of Sto. Tomas Tigresses at University of the East Lady Warriors sa ala-1 ng hapon.
Tangan ang 4-7 karta, nasa sixth place ng team standings ang Adamson at muling kakapitan si Nitura para masungkit ang panalo at mapaganda ang karta.
Sumiklab si Nitura sa kanilang huling laro nang ukitin ang 32 points mula sa 30 attacks at dalawang blocks upang gulatin ang defending champion National University, 25-23, 15-25, 28-26, 25-22.
Kailangan din ng tulong si Nitura sa iba pang Lady Falcons dahil tigasin ang Lady Tamaraws na may 8-4 baraha at nakapuwesto sa No. 3.
Samantala, pakay ng UST na palakasin ang kapit sa magic four, kasalukuyan nasa pang-apat sila hawak ang 7-4, may tatlong laro na lang ang nalalabi sa kanila kaya mahalaga ang bawat laban.