MANILA, Philippines — Itinakda ng National University Nazareth School at Bacolod Tay Tung ang ‘winner-take-all’ championship match sa 2025 Shakey’s Girls Volleyball Invitational League (SGVIL) Rising Stars Cup Division 1 sa La Salle Green Hills Gym.
Dinaig ng Lady Bullpups ang Emilio Aguinaldo College, 25-16, 25-15, 25-11, habang tinalo ng Thunderbolts ang De La Salle-Lipa, 25-20, 25-15, 25-18, sa semifinals kahapon.
Mag-aagawan ngayon ang NUNS at Bacolod Tay Tung para sa korona ng SGVIL matapos magharap sa gold medal round ng nakaraang 2025 Ilocos Norte Palarong Pambansa sa pinakamalaking grassroots volleyball league sa bansa na suportado ng Shakey’s Pizza Parlor, Peri-Peri Charcoal Chicken, Potato Corner and R at B Milk Tea.
Humataw si Sam Cantada, ang reigning UAAP MVP, ng game-high 20 points para pamunuan ang panalo ng Lady Bullpups sa Lady Bragadiers.
Nagdagdag si Harlyn Serneche ng 11 points, habang may 10 markers si Denesse Daylisan para sa NUNS na nakahugot kay setter Rihanna Navarro ng 14 excellent sets.
Pinamunuan ni Angel Perez ang EAC sa kanyang 13 points.
Sumandal naman ang 2024 runner-up Bacolod Tay Tung sa 18 points ni Rhose Almendralejo patungo sa kanilang ikalawang sunod na championship appearance.
Nag-ambag si Alexa Bertolano ng 10 markeres at may walong marka si Donna Mae De Leon para sa Thunderbolts.