MANILA, Philippines — Tinawag ni Capital1 Solar Energy co-owners Milka at Mandy Romero si Bella Belen bilang isang ‘game-changer’ at ‘franchise maker’.
Kaya bago pa man maganap ang 2025 PVL Rookie Draft noong Linggo ay pinili na ng Solar Spikers ang three-time UAAP Most Valuable Player mula sa National University bilang No. 1 overall selection.
“From the day we got the lottery pick, we knew it would be a huge advantage for our team,” wika ni Milka sa 22-anyos na si Belen. “We wanted to build momentum, and Bella Belen is a game-changer. A franchise maker.”
Kumpiyansa ang mag-utol na Romero na malaki ang magiging papel ni Belen sa darating na kampanya ng Capital1 sa 2025 PVL Reinforced Conference sa Setyembre.
Nauna nang kinuha ng Solar Spikers si Brazilian Olympic at Alas Pilipinas coach Jorge Souza de Brito bilang kapalit ni mentor Roger Gorayeb.
Sina Belen at de Brito ay kasalukuyang magkasama sa Hanoi, Vietnam kung saan sumasabak ang Alas Pilipinas sa 2025 AVC Women’s Nations Cup.
“We’d like that in our team na over time nakikita natin ang growth ng Alas, ang growth ng Capital1 and with our coach and with this new set of players,” sabi ni Milka.
Bukod kay Belen ay hinugot din ng Solar Spikers sa 2025 PVL Rookie Draft sina Pia Abbu at Ivy Aquino.