MANILA, Philippines — May bago nang tatanghaling kampeon sa PBA Season 49 Philippine Cup.
Ito ay matapos sibakin ng No. 1 San Miguel ang dating hari a No. 8 Meralco, 108-97, sa kanilang quarterfinals match kahapon sa Ninoy Aquino Stadium sa Malate, Manila.
Humakot si eight-time PBA MVP June Mar Fajardo ng 21 points, 15 rebounds at 4 blocks, habang may tig-19 markers sina Juami Tiongson at Don Trollano sa pagpasok ng Beermen sa best-of-seven semifinals series.
“It’s all about pride because we know na in the last all-Filipino, Meralco beat us. We redeemed ourselves from that loss,” ani coach Leo Austria.
Bigo ang Bolts na maidepensa ang kanilang koronang napanalunan noong Season 48.
Ang mananalo sa quarterfinal game ng No. 4 Barangay Ginebra at No. 5 Converge ang lalabanan ng SMB sa semis.
Itinayo ng Beermen ang 35-20 abante sa first period bago nakalapit ang Bolts sa 75-77 sa huling 1:27 minuto ng third quarter.
Muling nakalayo ang San Miguel sa 100-82 sa 6:12 minuto ng final canto patungo sa 106-90 pagbaon sa Meralco sa huling 1:10 minuto.
Samantala, pag-aagawan ng No. 2 NLEX at No. 7 Rain or Shine ang semis ticket ngayong alas-7:30 ng gabi sa Malate venue.
Ang semis berth din ang paglalabanan ng No. 3 Magnolia at No. 6 TNT Tropang 5G sa alas-5 ng hapon.
Tinalo ng Elasto Painters ang Road Warriors, 92-89, habang tinakasan ng Tropang 5G ang Hotshots, 89-88, noong Miyerkules.
Parehong may ‘twice-to-beat’ bonus ang NLEX at Magnolia.