MANILA, Philippines — Kailangan pang magsikap ang Alas Pilipinas matapos mabigong makakuha ng medalya sa katatapos lamang na first leg ng 2025 Southeast Asian V.League na idinaos sa City of Candon sa Ilocos Sur.
“The team needs to learn from their mistakes, their errors,” ani Philippine National Volleyball Federation president Ramon “Tats” Suzara. “Two wins and two losses, overall it’s a good result with this young team. But we still need to work harder.”
Tumapos ang mga Pinoy spikers na may 2-2 record sa torneo kasama ang 19-25, 17-25, 17-25 pagkatalo sa Indonesia sa agawan para sa silver medal noong Linggo.
Ang SEA V.League ay ginagamit ng Alas Pilipinas bilang preparasyon sa paglahok sa darating na FIVB Volleyball Men’s World Championship Philippines 2025 sa Setyembre.
Umaasa si Suzara na makakalaro na para sa national team sina injured veterans Marck Espejo (ankle) at Bryan Bagunas (knee).
Umiskor ang Alas Pilipinas ng straight-sets win sa perennial medal contender Vietnam bago isinunod ang Cambodia via five-setter.
Nakalasap naman ang Nationals ng isang three-set loss sa nagkampeong Thailand kasunod ang kamalasan sa Indonesia.
Nagpakitang-gilas para sa tropa si Leo Ordiales sa torneong sinuportahan ng mga PNVF Official Partners PLDT, Mwell, Meralco, ?Rebisco, Akari, Nuvali, PNVF official suppliers Asics, Senoh, ?Mikasa, official television partner Cignal, Philippine Sports Commission, ?Philippine Olympic Committee at ng City of Candon.
Hinirang si Ordiales bilang Best Opposite Hitter ng SEA V.League.
Samantala, hahataw ang second leg bukas sa Indonesia.
“We fell short. Just a bit short, I believe we will recover from this soon,” sabi ni team captain Kim Malabunga.