September 14, 2025 | 12:00am
USA wagi sa Colombia; Japan nasilat ng Turkiye
MANILA, Philippines — Lahat ng koponang naglalaro sa 2025 FIVB Volleyball Men’s World Championship ay mga de-kalibre.
Kaya naman dapat ibuhos ng Alas Pilpinas ang lahat ng kanilang makakaya para makasilat.
“Alam naman natin na itong naglalaro sa World Championship is top of the top,” ani Bryan Bagunas. “Ine-expect namin na every country, malakas so kailangan lang talaga namin mag-perform nang maayos at i-apply ‘yung natutunan namin sa training.”
Nakatikim ang World No. 82 Pilipinas ng 13-25, 17-25, 23-25 kabiguan sa No. 43 Tunisia sa sa Pool A sa kanilang debut sa men’s world championships noong Biyernes sa Mall of Asia Arena sa Pasay City.
Bumandera para sa Nationals ang 27-anyos na si Bagunas sa kanyang 23 points mula sa 20 attacks, dalawang service aces at isang block kontra sa mga Tunisians.
Sunod nilang sasagupain ang No. 23 Egypt sa Martes na isang ‘must win’ para sa tsansang makapasok sa Round of 16.
“Nakita natin sa game na napakaraming errors,” obserbasyon ni Bagunas. “Siguro less errors sa next game and focus sa mga little mistakes.”
Halos isang taon hindi nakalaro ang dating National University Bulldogs superstar dahil sa isang ACL injury noong Agosto ng 2024 na naging dahilan ng pagkawala niya sa Taiwanese champion club Win Streak.
Mula sa Win Streak sa Taiwan ay lumipat si Bagunas sa Osaka Bluteon team sa SV.League ng Japan.
“Sobrang saya ako kasi almost a year bago ako nakabalik,” wika ng 6-foot-5 na outside hitter. “Masaya ako na nakakatulong ulit ako sa team.”
Samantala, tinalo ng USA ang Colombia, 25-20, 25-21, 25-14, at dinispatsa ng No. 29 Portugal ang No. 10 Cuba, 20-25, 25-22, 25-19, 25-19, sa Pool D kahapon.
Nagsumite si team captain at setter Micah Christenson ng 23 excellent sets para sa mga Americans, habang pumalo si Ethan Champlin ng 17 points.
Pinabagsak naman ng No. 16 Turkiye ang No. 5 Japan, 25-19, 25-23, 25-19, samantalang dinaig ng Canada ang Libya, 22-25, 25-20, 25-12, 29-27, sa Pool G.
Ang top two teams sa bawat pool ang papasok sa Round of 16 ng world meet.