MANILA, Philippines — Swak sina Khylem Progella at Sofia Pagara ng Alas Pilipinas sa quarterfinals matapos patumbahin sina Chinese top pair Yan Xu at Zhou Mingli, 22-20, 22-20, sa Rebisco Asian Volleyball Confederation (AVC) Beach Tour Nuvali Open kahapon sa City of Santa Rosa sa Laguna.
Bagama’t nasayang ang match points dahil sa kanilang apat na sunod na service errors ay nakapasok pa rin sina Progella at Pagara sa round-of-eight sa world-class Nuvali Sand Courts By Ayala Land.
“I think we are still chasing our best, and I think this is good, we need it for future matches. And this is important, that we are able to win even when we didn’t play our really really really best,” ani Alas Pilipinas Brazilian beach volleyball coach Joao Luciano Kodai.
Sunod na lalabanan ng 19-anyos na si Progella at ng 20-anyos na si Pagara ng University of Santo Tomas sa quarterfinals sina Elizabeth Alchin at Georgia Johnson ng Australia.
Tinalo ng second-highest ranked team sina Samitta Simarongnam at Salinda Mungkhon ng Thailand, 19-21, 21-13, 15-10.
Samantala, minalas ang Alas Pilipinas women’s pairs nina Alexa Polidario ng Air Force at Lorien Gamboa ng UST kina Japanese duo Saki Maruyama at Miki Ishii, 21-12, 21-10.
Sa men’s division, bigo sina James Buytrago at Rancel Varga kina John McManaway at James Sadlier ng New Zealand.
Hindi natapos ni Buytrago ang laro dahil sa pamumulikat at isinuko ang 33-35, 18-21, 6-13 iskor.