August 30, 2025 | 12:00am
MANILA, Philippines — Muling nakitaan ng tikas si Lee Vann Corteza matapos kaldagin si World Cup of Pool co-champion James Aranas, 9-5, sa winner’s side ng Efren “Bata” Reyes Yalin 10-Ball Championships sa Pacman’s Cue Club sa Shaw Boulevard sa Mandaluyong City.
Swak sa round-of-32 ang six-time Southeast Asian Games gold medalist na si Corteza at nag-aabang ng makakalaban ngayong araw sa event na may premyong P1 milyon para sa magkakampeon.
Bago nakaharap ng 46-anyos na si Corteza si Aranas ay kinalos muna nito sina Lauro Bongay, 9-2, at reigning World 9-ball champion Carlo Biado.
“Mahirap na laban, mabuti nanalo ako kina Lauro, Carlo at Jamesa,” sabi ni Corteza.
Ang ibang rumampa sa round-of-32 sa event na suportado ni Senator Manny Pacquiao at inorganisa ni snooker champion Marlon Manalo ay sina Jesson Marabi, Baseth Mocaibat at Raymond Faraon.
Tinalo ni Marabi sina Marc Andraine Santos (9-7), Jomar Aribas (9-5) at Mario Tolentino (9-6); kinaldag ni Mocaibat sina Aivhan Maluto (9-8), Horace Angor (9-1), Zyrus Obello (9-7) at Val Jason Porras (9-6), habang naka-ungos si Faraon kina Jun Bansil (9-4), Romeo Silvano (9-7) at Patrick Gonzales (9-6).
Pasok din sa knockout stage sina Roland Garcia, Jerson Cumayas, Ronato Alcano at Arnel Bautista.