August 28, 2025 | 12:00am
Inireklamo ng isang mister sa Chengdu, China, na nagkaroon ng depression at anxiety ang kanyang misis matapos itong aksidenteng makitang nakahubad ng dalawang window cleaner habang natutulog sa loob ng kanilang high-rise na apartment.
Ayon sa salaysay ng lalaki na kinilala lamang bilang si Mr. Cheng, naganap ang insidente noong April. Paulit-ulit umano nilang hiniling sa management ng gusali na bigyan sila ng abiso bago isagawa ang paglilinis ng mga bintana sa labas.
Sa kabila nito, isang umaga ay bigla na lamang sumulpot ang dalawang trabahador sa labas ng bintana ng kanilang silid-tulugan, kung saan natutulog nang walang saplot ang kanyang misis.
“Halos apat na buwan na ang nakalipas, at na-diagnose siya ng doktor na may depression at anxiety,” reklamo ni Mr. Cheng.
Sinabi ni Cheng na humihingi siya ng public apology at makatwirang danyos mula sa pamunuan ng apartment, ngunit tinanggihan umano ito.
Ang tanging inialok sa kanila ay isang 600 yuan na diskuwento sa kanilang susunod na upa, na itinuturing nilang insulto dahil nagbabayad sila ng 10,000 yuan (humigit-kumulang 79,000 pesos) kada buwan.
Ang kuwento ay nagbunsod ng mainit na debate sa Chinese social media. Ang ilan ay sinisisi ang management ng gusali sa hindi pagbibigay ng abiso, habang ang iba naman ay sinisisi ang babae dahil sa hindi pagsasara ng kanyang mga kurtina.
Mayroon pang nagbiro na inilagay ng misis sa panganib ang mga window cleaner dahil maaaring malaglag ang mga ito sa gulat matapos siyang makitang nakahubad.
Ang insidente ay nagbukas ng diskusyon tungkol sa karapatan sa privacy sa mga high-rise na tirahan at ang responsibilidad ng mga property management.