November 16, 2025 | 12:00am
“BAKIT nga pala tayo babalik kay Tandang Santo, Apol?” tanong ni Manang na nakaupo sa likuran ng kotse.
Si Guava ang sumagot.
“Mayroon po akong nakalimutang itanong sa kanya, Manang.”
“Ah—akala ko kung ano na kaya tayo babalik sa matanda.”
“Magtataka siguro sa atin si Tandang Santo kung bakit tayo bumalik.”
“Hindi naman siguro. At saka maaring nahuhulaan na niya kung bakit tayo nagbalik.”
“Marami akong gustong malaman Manang,” sabi ni Guava.
“Ako rin Manang, marami rin akong itatanong kay Tandang Santo,” sabi naman ni Apol.
“Ano ang itatanong mo Apol?”
“Sabi kasi ni Tandang Santo, lalapitan kami ni Guava ng suwerte. Itatanong ko kung anong suwerte yun. Tatama ba kami sa lotto?”
“Baka mayroong nakabaon na kayamanan sa lote mo?”
Napamaang si Apol. ‘Di ba’t ito rin ang pinag-usapan nila ni Guava nung isang araw.
“Bakit nasabi na may kayamanan sa bakuran ko Manang?”
“Kasi nung panahon daw ng Hapon, e ginawang garrison ang subdibisyon natin. Baka raw sa lugar na iyon may ibinaon na kayamanan ang mga Hapones.”
Napatangu-tango si Apol.
Nagsalita si Guava.
“E di yan ang itanong natin kay Tandang Santo. Mahuhulaan kaya niya?”
“Subukan natin. Pagnagkaon, yayaman ako.”
“Balatuhan mo ako Apol.”
“Oo Manang. Basta ikaw.”
Itutuloy