MANILA, Philippines — Marami ang nagulat nang masilat ang No. 3 Cignal HD sa No. 10 Galeries Tower sa qualifying round ng 2024-25 Premier Volleyball League(PVL) All-FilipinoConference.
Kaya nahulog ang HD Spikers sa play-in tournament kung saan kaagad nilang tinalo ang Capital1 Solar Spikers, 25-21, 22-25, 25-17, 25-15, sa Pool A.
“Siyempre ‘yung opportunity pa rin na makapasok sa quarters,” sabi ni Cignal libero Dawn Macandili-Catindig. “Although it is a challenge na we have to go through the play-in, but that’s the reality na kailangan naming i-accept.”
Sa nasabing panalo ng HD Spikers ay humataw si star hitter Vanie Gandler ng 20 points bukod sa 14 excellent receptions.
May 18 execellent digs ang 28-anyos na si Macandili-Catindig para sa kanilang depensa.
Kumpiyansa si coach Shaq delos Santos na makakasampa ang Cignal sa best-of-three quarterfinals series katapat ang Petro Gazz.
Kailangan na lamang nilang talunin ang ZUS Coffee sa Martes sa PhilSports Arena sa Pasig City.
“Maraming puwedeng mangyari and nire-reassure lang kami nila coach (Delos Santos) na there’s still an opportunity na makapasok sa quarterfinals. Kailangan lang namin siyang pagtrabahuhan,” wika ni Macandili-Catindig.
Nakatakda ang duwelo ng HD Spikers at Thunderbelles sa alas-6:30 ng gabi matapos ang salpukan ng Chery Tiggo Crososvers at Farm Fresh Foxies sa alas-4 ng hapon.