February 25, 2025 | 12:00am
MANILA, Philippines — Aminado si head coach Tim Cone na dinomina ng husto ng New Zealand ang Gilas Pilipinas sa final window ng FIBA Asia Cup Qualifiers.
Walang ibang nasa isip si Cone kundi ang mag-move on at tumutok sa mga susunod na mas importante nitong laban.
Halimaw ang Tall Blacks na nagpasabog ng 13 three-pointers upang maitarak ang 87-70 panalo sa Auckland, New Zealand.
“The Tall Blacks came out and just smashed us early and just gave us a smash mouth in the first quarter. We just never really recovered,” ani Cone.
Nakuha ng New Zealand ang top seeding sa Group B tangan ang 5-1 marka habang nahulog naman ang Gilas Pilipinas sa 4-2 para sa No. 2 seed.
“They came out all guns firing. Jordan Ngatai hit a couple of threes early and got to the rim a couple of times and that kinda set the tone. (Tohi Smith) Milner was great all night. We were just playing on our heels the whole game, just trying to recover back from that early barrage,” ani Cone.
Hindi naman basta-basta sumuko ang Gilas Pilipinas sa laban.
Sa katunayan, nakadikit ito sa 66-77 sa huling kanto ng laban.
Subalit kinapos ito matapos umarangkada ang Tall Blacks para makuha ang panalo.
Maganda ang ginawang depensa ng New Zealand kay naturalized player Justin Brownlee na nalimitahan lamang sa 10 puntos kung saan 5-of-8 shooting lamang ang nagawa nito.
“We had our opportunities to get the game tighter, but we just couldn’t make a big shot here or there. Maybe we would have got the game a little closer. But as it turned out, they ran away from it,” ani Cone.
Nais ni Cone na isentro na ang atensiyon ng Gilas sa FIBA Asia Cup proper na idaraos sa Agosto sa Jeddah, Saudi Arabia.
Bago ang FIBA Asia Cup proper, inaasahang muling sasalang sa pukpukang ensayo ang Gilas Pilipinas para masigurong handang-handa ito.
Ikakasa rin ng Samahang Basketbol ng Pilipinas ang ilang tuneup games para masubok ang Gilas.