October 19, 2025 | 12:00am
MANILA, Philippines — Bumandera sina American import Lindsey Vander Weide at Fil-Am Brooke Van Sickle para tulungan ang Petro Gazz sa 25-15, 20-25, 25-23, 25-21 pagdaig sa Chery Tiggo sa 2025 Premier Volleyball League (PVL) Reinforced Conference kahapon sa Capital Arena sa Ilagan City, Isabela.
Humataw si Vander Weide ng 25 points at 11 receptions at kumolekta si Van Sickle ng triple-double na 25 markers, 15 receptions at 10 digs para sa 2-1 baraha ng Gazz Angels sa Pool B.
Nagmula ang 2024 PVL All-Filipino Conference champions sa 20-25, 21-25, 25-17, 20-25 pagyukod sa nagdedepensang Creamline Cool Smashers.
“It just comes from us playing as a team. Someone digging, someone’s going for the ball and putting it away,” ani Vander Weide.
Nag-ambag sina Myla Pablo at Fil-Am MJ Phillips ng tig-10 markers at tumipa si setter Julyana Tolentino ng 21 excellent sets.
Bagsak ang Crossovers sa ikatlong sunod na talo matapos ang runner-up finish sa PLDT High Speed Hitters sa nakaraang 2025 PVL On Tour.
Sa likod nina Cuban reinforcement Yani Batista at Cess Robles ay nakatabla ang Chery Tiggo sa second set, 25-20, at nakabangon mula sa 9-16 pagkakaiwan sa third frame.
Ibinalik ni Van Sickle sa porma ang Petro Gazz para kunin ang 25-23 panalo sa nasabing yugto at ilista ang 2-1 bentahe sa laro.
Inilista ng Crossovers ang 21-19 abante sa fourth set sa pamumuno nina Batista at Mylene Paat.
Nag-init ang mga kamay ni Vander Weide at hinataw ang apat sa huling anim na puntos ng Gazz Angels para tapusin ang laro sa 25-21.
Bumira si Batista ng 21 points sa panig ng Chery Tiggo kasunod ang 14 markers ni Robles.