October 22, 2025 | 12:00am
MANILA, Philippines — Nagpasabog si Belgian import Helene Rousseaux ng 36 points sa 25-22, 22-25, 25-21, 25-22 pagsagasa ng Farm Fresh sa Capital1 Solar Energy sa 2025 Premier Volleyball League (PVL) Reinforced Conference kahapon sa Smart Araneta Coliseum.
Hinataw ng Foxies ang ikatlong sunod na panalo sa Pool A para sa kanilang best tournament start sa franchise history simula nang sumali sa PVL noong 2023.
Nag-ambag sina Trisha Tubu at Ces Molina ng tig-13 markers at tumipa si Fil-Am setter Alohi Robins-Hardy ng 21 excellent sets para sa opensa ng tropa ni Italian coach Alessandro Lodi.
“We knew it would be hard and we likely made things harder for ourselves with some stupid decisions,” sabi ni Lodi.
“We’ll need to grow from that if we want to go on a higher level with grit, determination and clarity of our system,” dagdag ni Lodi.
Laglag ang Solar Spikers sa 1-2 marka at nabigong maduplika ang naunang four-set win sa Nxled Chameleons.
Kumana si Ukrainian import Oleksandra Bytsenko ng 26 points at nag-ambag si No. 1 overall pick Bella Bellen ng 20 markers para sa Solar Spikers na nakatabla sa second set, 25-22.
Sinandalan ng Farm Fresh sina Tubu, Molina at Rizza Cruz sa third frame para sa 25-21 panalo na kanilang itinuloy sa fourth set sa pamumuno ni Rousseaux.
Samantala, winalis ng Choco Mucho ang Nxled, 25-23, 25-19, 25-22.
Pumalo si American import Marlee Smith ng 20 points para sa 2-1 baraha ng Flying Titans sa Pool A.
Bagsak ang Chameleons sa 0-3.
Pinangunahan ni Spanish import Paola Martinez ang Nxled sa kanyang 20 points kasunod ang siyam na marka ni Lyann De Guzman.
Nauna silang natalo sa Farm Fresh at Capital1 bago yumukod sa Choco Mucho.