MANILA, Philippines — Wala pa munang magarbong selebrasyon ang Petro Gazz matapos itong magkampeon sa katatapos na Premier Volleyball League (PVL) All-Filipino Conference noong Sabado.
Balik-ensayo agad ang Gazz Angels para paghandaan naman ang AVC Champions League na papalo na sa Abril 20 hanggang 27 sa Philsports Arena sa Pasig City.
Target ng Gazz Angels na madala ang magandang momento sa AVC tournament na tatampukan ng matitikas na club teams sa Asya.
Kaya naman puspusan na ulit ang paghahanda ng Gazz Angels para masigurong preparado ang mga ito bago ang torneo.
“May AVC pa tayo,” ayon kay Petro Gazz team captain Remy Palma matapos ang kampeonato ng kanilang tropa kontra sa Creamline Cool Smashers.
Babanderahan ang tropa nina PVL All-Filipino Conference MVP Brooke Van Sickle at Finals MVP MJ Phillips na parehong maglalaro bilang imports ng Gazz Angels.
Idineklarang imports sina Van Sickle at Phillips dahil pareho itong nasa ilalim pa ng USA vollleyball federation kaya hindi pa ito maaaring maglaro bilang local players ng Pilipinas.
Gayunpaman, inaasikaso na ng Philippine National Volleyball Federation (PNVF) ang paglipat ng federation nina Phillips at Van Sickle gayundin ni Savi Davison ng PLDT para makalaro ang mga ito bilang local players.
Kasama pa naman ang tatlo sa 33 wishlist ng PNVF para sa bubuuing national team na sasabak sa ibat ibang international tournaments partikular na sa 2025 Southeast Asian Games sa Bangkok, Thailand sa Disyembre.
Sesentro muna ang atensiyon nina Van Sickle at Phillips sa AVC Champions League kung saan mapapalaban ito sa Group B kasama ang Kaohsiung Taipower ng Taiwan at Hip Hing ng Hong Kong.