September 13, 2025 | 12:00am
MANILA, Philippines — Matapos malasin sa quarterfinal round ng nakaraang 2025 FIBA Asia Cup noong Agosto ay paghahandaan ng Gilas Pilipinas ang 2027 FIBA World Cup Asian Qualifiers sa Nobyembre.
Kumpiyansa ang Samahang Basketbol ng Pilipinas (SBP) na makakabangon ang Nationals mula sa kabiguan sa FIBA Asia Cup na idinaos sa Jeddah, Saudi Arabia.
Ayon kay SBP executive director Erika Dy, may sapat na panahon si coach Tim Cone para maihanda nang husto ang Gilas Pilipinas sa World Cup Asian Qualifiers na magsisimula sa Nobyembre 27 sa Doha, Qatar.
“Because the World Cup Qualifiers, that’s where it starts, it doesn’t begin until November, December, so we have to regroup,” ani Dy.
“I believe coach Tim (Cone) knows what to do, he had a really good assessment of the previous tournament and he’s already working towards adjustment for the coming qualifiers,” dagdag nito.
Kasama ng Gilas Pilipinas sa Group A ng World Cup Asian Qualifiers ang New Zealand, Australia at Guam.
Unang makakatapat ng Gilas ang Guam sa Nobyembre 28 kasunod ang rematch nila sa Disyembre 1, ang New Zealand sa Pebrero 26 at ang Australia sa Marso 1, 2026.
Nasa Group B ang China, Japan, Korea at Chinese Taipei, habang magkakasama sa Group C ang Iran, Jordan, Syria at Iraq at nasa Group D ang Lebanon, Saudi Arabia, Qatar at India.
Bukod sa World Cup Asian Qualifiers ay sasabak din ang Gilas sa Olympic Qualifying Tournaments para sa 2028 Olympic Games sa Los Angeles, USA.