MANILA, Philippines — Nagdagdag ng puwersa ang Cignal HD matapos hugutin sina outside hitter Heather Guino-o at middle blocker Ethan Arce para sa darating na 2025 Premier Volleyball League (PVL) season.
Nauna nang kinuha ng HD Spikers si veteran Tine Tiamzon na nagretiro noong 2023.
“Team Awesome is thrilled to welcome Heather Guino-o, a reliable scorer and steady presence on the wing, as she’s ready to make a significant impact with the Cignal HD Spikers in the next conference,” wika ng Cignal sa kanilang Facebook post kahapon.
Naglaro si Guino-o, dating kamador ng Far Eastern University Lady Tamaraws sa UAAP, sa Capital1 Solar Spikers sa nakaraang dalawang PVL conferences.
Galing naman ang dating University of the Philippines Lady Maroons standout na si Arce sa Petro Gazz Angels na nagreyna sa nakaraang All-Filipino Conference kontra sa Creamline Cool Smashers.
“From one red squad to another, Ethan Arce brings her strength, grit, and passion to the Cignal HD Spikers as we set our sights even higher next conference,” ani ng HD Spikers kay Arce.
Nagkaroon ng problema si coach Shaq delos Santos nang umalis sa Cignal sina team captain Ces Molina at veteran middle Riri Meneses.
Ang paghugot sa 27-anyos na si Guino-o at sa 24-anyos na si Arce ang inaasahang magtatakip sa butas na iniwan nina Molina at Meneses sa HD Spikers.