September 15, 2025 | 12:00am
MANILA, Philippines — Tatlong taon ang kontratang pinirmahan ni Juan Gomez de Liaño para sa Converge simula sa PBA Season 50 sa Oktubre 5 sa Smart Araneta Colisuem.
Kasama ang agent na si Marvin Espiritu ng Espiritu Manotoc Baskebtall Management (EMBM) ay siniguro ni De Liaño ang puwesto niya sa FiberXers matapos maging No. 2 overall pick sa 2025 PBA Rookie Draft.
Nanguna para sa kampo ng Converge si Pampanga vice governor Dennis “Delta” Pineda na naitalagang bagong head coach kapalit ni Franco Atienza.
Matatandaang nakuha ng Converge ang rights para segundang pumili sa draft matapos ang trade sa Phoenix kapalit ng kanilang No. 8 pick at ni Bryan Santos.
Ito ang ginamit nila upang sungkitin si De Liaño ng University of the Philippines sa UAAP kasunod ng No. 1 overall pick na si Geo Chiu ng Ateneo na napunta sa Terrafirma.
Sakto ang pagkuha ng Converge kay De Liaño para lalong palakasin ang backcourt nito sa pamumuno nina Alec Stockton at Schonny Winston habang hinihintay pa si Mikey Williams na nakuha naman nila mula sa TNT Tropang 5G kapalit si Jordan Heading.
Sa pagdating ni De Liaño ay kumpleto rekados na ang roster ng FiberXers tampok din sina 2024 No. 1 overall pick Justine Baltazar at Justin Arana para sa tsansang makapagsabayan kontra sa mga pambatong San Miguel, TNT, Barangay Ginebra at Rain or Shine.
Dati ring manlalaro ng Batang Gilas at Gilas Pilipinas seniors team si De Liaño bukod pa ang karanasan sa Lithuania, Japan at Korea kaya malaki ang inaasahan ng Converge sa kanya.
Kung naselyuhan na ng Converge ang pick nito, ang Terrafirma naman ay kailangan munang hintayin si Chiu na tapusin ang kontrata nito sa Abra Solid North Weavers sa MPBL.
Idinaraos pa ang MPBL na tatapusin muna ni Chiu ngayong taon bago makapirma at masamahan ang Dyip na lalarga na kaagad ang first conference na Philippine Cup.