August 17, 2025 | 12:00am
MASYADONG unpopular ang hayagang pakikialam ni DILG Secretary Jonvic Remulla sa reshuffle ng top officials ng PNP. Kaya sa ngayon, isinusuka na si Boss Jonvic, hindi lang ng PNP, kundi maging ng rank-and-file ng Bureau of Jail Management and Penology at Bureau of Fire Protection na nasa ilalim ng pangangalaga ng opisina niya.
Imbes na pairalin ang pagkakaisa, lalong pinagwatak-watak ni Boss Jonvic ang PNP nang iutos niya, sa pamamagitan ng National Pollice Commission, na balewalain ang reshuffle na ikinasa ni PNP chief Gen. Nicolas Torre III. Nais kasi ni Remulla na ibalik sa dating puwesto ang “manok” niyang si Lt. Gen. Jose Melencio “Tateng” Nartatez na karibal ni Torre sa pagka-chief PNP. Dipugaaa!
Magtagumpay kaya si Boss Jonvic? Hanggang noong Sabado, wala pang inisyu na order si Torre para sundin ang kahilingan ni Boss Jonvic. May namumuong “turf war” sa pamamagitan nina Boss Jonvic at Torre? Ano sa tingin n’yo mga kosa? Hehehe! Ang sakit sa bangs nito!
Sa panghihimasok ni Boss Jonvic sa desisyon ni Torre, inilayo niya ang sarili hindi lang sa PNP, BJMP, at BFP, kundi sa taumbayan na pumapabor sa public service na pinaiiral ng una para pangalagaan ang kaligtasan ng mga Pinoy laban sa mga kriminal.
Ngayon lang kasi nagkaroon ng PNP chief na may sariling programa ang 5-minute response na pinaboran maging ni President Bongbong Marcos. Kahit nagulantang ang kapulisan sa programang ito ni Torre, niyakap nila ito dahil ang kapakanan ng mga Pinoy ang makikinabang dito.
‘Ika nga, may pulis na sa kalye na handang magresponde sa panawagan ng tulong 24/7 at ang gagawin lang ay pindutin ang numerong 911. Eh di wow! Hehehe! Kailangan pa bang i-memorize ‘yan?
Hindi naman nagpahuli ang 18 PNP regional directors, PNPA Alumni Association Inc., Association of Police Officers via Lateral Entry (APOLE) at iba pang mataas na opisyales ng PNP na magkaisa sa likod ni Torre. Naiwang mag-isa sa kangkungan si Boss Jonvic. ‘Ika nga, “reading between the lines” ang simpatya at tiwala ng uniformed personnel ay wala kay Boss Jonvic.
Ang kanilang tahimik ngunit malinaw na posisyon ay nagpapakita nang lumalaking persepsiyon na isinusuka na si Boss Jonvic ng mga institusyong dapat niyang pinamumunuan at ipinagtatanggol.
Hindi rin nagustuhan ng kapulisan ang lantaran at garapalan na pakikialam ni Boss Jonvic, sa pamamagitan ng NAPOLCOM, sa kagustuhan niyang maibalik sa puwesto si Nartatez, na nakasama niya sa Calabarzon. Sobrang obvious ang pagkiling ni Boss Jonvic kay Nartatez at hindi na niya ito maitatanggi. Ano pa nga ba? Hehehe! Kanya-kanyang gimik lang ‘yan!
Ang ganitong klase ng panghihimasok ni Boss Jonvic ay malinaw na pang-aabuso sa kapangyarihan at direktang paglabag sa awtonomiya ng liderato ng PNP na itinatakda ng batas. Habang tumatagal si Boss Jonvic sa DILG, lalong lumalalim ang demoralisasyon sa hanay ng mga pulis, bumbero at jail officers.
Imbes na magkaisa sa ilalim ng iisang direksiyon, tila nagiging hadlang pa ang liderato niya sa pagkakaroon ng matatag na relasyon sa mga taong nasa frontlines ng seguridad at kaayusan. ‘Ika nga, hindi na epektib si Boss Jonvic sa puwesto niya.
Kung ang tunay na layunin ni PBBM ay ang pagkakaisa, respeto, at mataas na moral sa hanay ng uniformed services, panahon na para palitan ang lider na hindi na kinikilala ng kanyang mga nasasakupan. Ang DILG ay hindi laruan ng pulitika o personal na ambisyon.
Abangan!